მთავარი

ძიება

ვიდეო

ქვიზები

კონტაქტი

ეროვნული ბანკი 25 მარტს სავალუტო აუქციონზე $40 მლნ-ს გაყიდის

საქართბელოს ეროვნული ბანკის შესასვლელი

ეროვნული ბანკი ლარის რეკორდულ გაუფასურებასთან დაკავსირებით განცხადებას ავრცელებს. პროცესს კორონავირუსის პანდემიას უკავშირებს და მისი გავლენის შესამცირებლად 25 მარტს $40 მლნ-იან სავალუტო ინტერვენციას აანონსებს.

„კორონავირუსით გამოწვეული ეკონომიკური შოკი და პანდემიის მომავალი განვითარებისა და საქართველოს ეკონომიკაზე მისი გავლენის მოლოდინები ­­ბოლო დღეების განმავლობაში სავალუტო ბაზარზე გაზრდილ მერყეობაშიც აისახა. 

მიუხედავად იმისა, რომ არსებობს მრავალი გაურკვევლობა, ეროვნული ბანკი ინტენსიურ რეჟიმში მუშაობს ნეგატიური შედეგების მოსახლეობაზე გავლენის მინიმიზაციის მიმართულებით. სავალუტო ბაზრის უცხოური ვალუტით მიწოდების მხარდასაჭერად ეროვნულმა ბანკმა უკვე განახორციელა ორი ინტერვენცია საერთო ჯამში 60 მლნ აშშ დოლარის ოდენობით. ამავე დროს, როგორც ცნობილია, წინა წლებში ხორციელდებოდა რეზერვების დაგროვება.

მნიშვნელოვანია, რომ ეკონომიკურ გამოწვევებს საქართველოს ფინანსური სისტემა მომზადებული შეხვდა. საბანკო სექტორი ჯანსაღი და მდგრადია, რაც იმის გარანტია, რომ შოკის პიკის გადავლის შემდგომ საქართველოს ეკონომიკა სწრაფად აღდგენას და ნორმალურ რეჟიმში დაბრუნებას შეძლებს.

სავალუტო ბაზრის მხარდაჭერის მიზნით, საქართველოს ეროვნული ბანკი 25 მარტის აუქციონზე 40 მილიონ აშშ დოლარს გაყიდის.“ - აღნიშნულია ეროვნული ბანკის განცხადებაში.

24 მარტს ლარმა მორიგი ფსიქოლოგიური ზღვარი გადალახა და Bloomberg-ის სავაჭრო პლატფორმაზე 3.50-იან ნიშნულს გადასცდა.