თიბისისა და სოფლის განვითარების სააგენტოს ხელშეწყობით, გარდაბანში ახალი საწარმო ამოქმედდა
1632305314
გარდაბნის მუნიციპალიტეტში, სოფელ სართიჭალაში თანამედროვე სტანდარტებით აღჭურვილი საშრობი და მარცვლეულის შესანახი კომპლექსი - შპს „სართიჭალის საშრობი“ თიბისისა და სახელმწიფოს ფინანსური მხარდაჭერით მოეწყო. ინფორმაციას თიბისი ბანკი ავრცელებს.
ბანკის ინფორმაციით, შემნახველი ინფრასტრუქტურის მოსაწყობად, 3,5 მილიონი ლარის ინვესტიცია განხორციელდა, საიდანაც თიბისის თანამონაწილეობა, შეღავათიანი აგროკრედიტის ფარგლებში, 3 მილიონი ლარია, 500 000 ლარი კი - სოფლის განვითარების სააგენტოს გრანტი.
„სართიჭალის საშრობში“, სადაც საწყის ეტაპზე 10 ადგილობრივია დასაქმებული, 9 000 ტონა მარცვლეულის შენახვაა შესაძლებელი, საათში კი - 40 ტონა მარცვლეულის გაშრობა.
ამავე ცნობით, კომპანიის სილოსებში საკუთარ მეურნეობაში მოყვანილი 9 მილიონი ტონა სიმინდი ინახება, რაც საქართველოში იმპორტირებული სიმინდის 10%-ია.
ცნობისთვის, შეღავათიანი აგროკრედიტის პროექტი საქართველოს სოფლის მეურნეობის სამინისტროს მიერაა ინიცირებული.
პროექტის მიზანია ფერმერების და სოფლის მეურნეობაში ჩართული მეწარმეების იაფი, გრძელვადიანი და ხელმისაწვდომი ფულადი სახსრებით უზრუნველყოფის გზით, სოფლის მეურნეობის პირველადი წარმოების, გადამამუშავებელი და შენახვა-რეალიზაციის საწარმოო პროცესების გაუმჯობესება.
ინფორმაციისთვის, თიბისის სოფლის მეურნეობის სექტორში ჯამურად 500 მილიონ ლარზე მეტი ინვესტიცია აქვს განხორციელებული.
