ოკუპირებული აფხაზეთი რუსეთს შორდება?
1596192329
ოკუპირებულ აფხაზეთსა და რუსეთს შორის პანდემიის ფონზე გაუარესებბული ეკონომიკური და პოლიტიკური ურთიერთობები თვალშისაცემი გახდა. ამის შესახებ სტატიას journal.zone აქვეყნებს.
გამოცემის თანახმად, რუსეთში საუბრობენ, რომ აფხაზეთში ეკონომიკური კრიზისია და აფხაზები ქართველებთან დაახლოებაზე სულ უფრო ხშირად ფიქრობენ. ასევე აღნიშნულია, რომ თბილისი აფხაზებს ეკონომიკური თანამშრომლობისა და ჰუმანიტარული პროგრამების კონკრეტულ მექანიზმებს სთავაზობს.
„აფხაზები ქართველებში მტერს ვეღარ ხედავენ“,- ნათქვამია მასალაში.
საინფორმაციო სააგენტო PIA.GE-მასალაში გამოთქმული მოსაზრებების შესაფასებლად კონფლიქტოლოგ პაატა ზაქარეიშვილს დაუკავშირდა.
როგორც კონფლიქტების სპეციალისტი ჩვენთან საუბრაში აცხადებს, სტატია პრორუსული ძალების შეკვეთას ჰგავს, რითაც ისინი რუსეთისთვის კონკრეტული მესიჯის გაგზავნას ცდილობენ.
„ვფიქრობ, ეს მასალა პრორუსული ძალების შეკვეთას ჰგავს, რადგან ისინი ოკუპირებულ რეგიონში რუსეთთან გაუარესებული ურთიერთობით შეშფოთებული არიან. მათ აღელვებთ იმის ალბათობა, რომ აფხაზ საზოგადოებაში რუსეთის მიმართ ინტერესი შესაძლოა დაიკარგოს, ამიტომ რუსეთს გამოფხიზლებისკენ მიანიშნებენ. რეალურად აფხაზეთსა და რუსეთს შორის კავშირი ნამდვილად შესუსტებულია. ყირიმის ანექსიის შემდეგ, რუსი ტურისტების დიდი ნაწილი დასავენებლად აფხაზეთს აღარ ირჩევს. ამიტომ 2015 წლის შემდეგ, იქ სტაგნაცია აშკარად იგრძნობა, რაც პრორუსული ძალების ინტერესებს აზიანებს“, - აღნიშნა პაატა ზაქარეიშვილმა.
მისივე თქმით, ოკუპირებულ აფხაზეთში ბოლო პერიოდში ნამდვილად არის საქართველოს ხელისუფლებასთან დიალოგის დაწყების სურვილის ნიშნები, რაც ასლან ბჟანიასა და სერგეი შამბას განცხადებებში ნათლად ჩანს, თუმცა ხელისუფლება ამას რატომღაც უყურადღებოდ ტოვებს.
„სამწუხაროდ, მთავრობა უყურადღებოდ ტოვებს აფხაზებისგან გამოთქმულ მზაობას დიალოგის შესახებ, ხოლო ასეთ მნიშვნელოვან პეწრიოდს, როცა რუსეთის ფინანსური გავლენა აფხაზეთში შესუსტებულია, ხელიდან უშვებს“, - განაცხადა კონფლიქტოლოგმა.
მიმდინარე თვეში ოკუპირებული აფხაზეთის ე.წ. პრეზიდენტმა ასლან ბჟანიამ „დამოუკიდებლობის“ აღიარების გარეშე, თბილისთან ურთიერთობების დასალაგებლად მზადყოფნა გამოთქვა და „ძალის გამოუყენებლობის შესახებ შეთანხმებაზე“ ხელმოწერა მოითხოვა.
ეს განცხადება მას შემდეგ გაკეთდა, რაც რუსეთმა აფხაზეთს ფინანსური დახმარება შეუმცირა, ხოლო თბილისმა ოკუპირებულ ტერიტორიაზე მყოფ აბიტურიენტებს უნივერსიტეტებში ჩარიცხვის უფლება ერთიანი ეროვნული გამოცდების გარეშე მისცა.
