„იმაზე მეტს უნდა აცრა, ვიდრე ვაწვდით და საჭიროა, რომ უფრო მეტად გავაინტენსიუროთ,“ - ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ საკოორდინაციო საბჭოს სხდომის დასრულების შემდეგ ბრიფინგზე განაცხადა.
ამირან გამყრელიძის თქმით, 100-მდე სამედიცინო დაწესებულების 161 ბრიგადა ცრის მოსახლეობას.
„ამ ეტაპზე იმაზე მეტს უნდა აცრა, ვიდრე ვაწვდით. საჭიროა, რომ უფრო მეტად გავაინტენსიუროთ პროცესი. დღეისთვის 100-მდე სამედიცინო დაწესებულების 161 ბრიგადა ცრის, მაგრამ ზოგიერთი ბრიგადები რაიონებში ყოველდღიურ რეჟიმში არ მუშაობენ, კვირაში 3-4 დღეა.
გვინდა, რომ გაიზარდოს და 7-დღიან სამუშაო რეჟიმში გადავიდეთ. წახალისება უნდა გავუკეთოთ სპეციალისტებს. ამ თვის ბოლოდან გვინდა ავიდეთ 161-დან 200 ბრიგადამდე. თითო ბრიგადა დღეში 42-დან 50-მდე აცრას აკეთებს. ივნისის ბოლოსთვის 300 ბრიგადა მაინც უნდა იყოს, რომელიც ივლისში აცრას 15 ათასამდე აიყვანს. ამას რა თქმა უნდა ვაქცინის შესაბამისი მარაგი უნდა მოყვებოდეს“, - განმარტა ამირან გამყრელიძემ.
საქართველოში ბოლო 24 საათის განმავლობაში კოვიდინფიცირების 1 788 ახალი შემთხვევა დადასტურდა, ხოლო 1 251 ადამიანი გამოჯანმრთელდა.
კორონავირუსის დადასტურებული შემთხვევების საერთო რაოდენობა 324 256-ს შეადგენს, ხოლო სულ გამოჯანმრთელებულია 303 679 პირი.
რაც შეეხება დადებითობის მაჩვენებელს, დღიური - 5,76%, ბოლო 14 დღის - 6,07%, ბოლო 7 დღის - 6,35%-ია.
ინფორმაციისთვის, მუნიციპალური ტრანსპორტის მოძრაობის შეზღუდვა 13 მაისიდან მოიხსნება, აღნიშნული გადაწყვეტილება მთავრობის საკოორდინაციო საბჭოზე მიიღეს.
ამავე თემაზე:
👉 „თუ არ გავლაღდებით, 2 კვირაში ვირუსმა უკუსვლა უნდა დაიწყოს“ - გამყრელიძე
👉 „არ გვაქვს იმის შესაძლებლობა, რომ კომენდანტის საათის გადაწევაზე ვიფიქროთ“- თამარ გაბუნია
👉 963 თბილისი, იმერეთი 178 - კორონავირუსის გავრცელების არეალი რეგიონებში