კორონავირუსით ინფიცირებულ პაციენტს მკურნალობის შემდეგ, გამოჯანმრთელებულის სტატუსი შესაძლოა ტესტის გარეშე მიენიჭოს. ამის შესახებ ჯანდაცვის მინისტრის მოადგილემ თამარ გაბუნიამ საკოორდინაციო საბჭოს სხდომის დასრულების შემდეგ, მთავრობის ადმინისტრაციაში გამართულ ბრიფინგზე განაცხადა.
„24-საათიანი ინტერვალით, ორჯერადი ტესტირების რეკომენდაცია საერთაშორისო დონეზე უკვე აღარ არის და პირს შესაძლებელია გამოჯანმრთელებულის სტატუსი ტესტის გარეშეც მიენიჭოს, თუ სიმპტომები აღარ აქვს“, - აღნიშნა თამარ გაბუნიამ.
მისი თქმით, შესაძლოა, ზოგიერთ შემთხვევაში ექიმმა ტესტის ჩატარება აუცილებლად ჩათვალოს, თუმცა ეს ყველა შემთხვევას აღარ ეხება.
როგორც ჯანდაცვის მინისტრის მოადგილემ განმარტა, საქართველოში კორონავირუსით სიკვდილიანობის მაჩვენებელი 0.57%-ია, რაც ძალიან კარგი შედეგია.
ინფორმაციისთვის, საქართველოში დღეს კორონავირუსით ინფიცირების 298 ახალი შემთხვევა დადასტურდა, რის შედეგადაც ჯამური რიცხვი 5 552-მდე გაიზარდა. გამოჯანმრთელებულია 2 054 და გარდაცვლილია 30 პაციენტი.