კაკაურიძე: სახელმწიფო ვალი მშპ-ის 55%-ს გადააჭარბებს
1592228053
„ჩვენ ვალი ავიღეთ იმისთვის, რომ სრულად ყოფილიყო ქვეყანა დაზღვეული როგორც ეკონომიკური კრიზისის პირობებში, ასევე, პანდემიის გაგრძელების შემთხვევაში“, - განაცხადა ფინანსთა მინისტრის მოადგილემ, გიორგი კაკაურიძემ ფრაქცია „ნაციონალური მოძრაობის“ სხდომაზე 2020 წლის ბიუჯეტში ცვლილებების პროექტის წარდგენისას.
როგორც მან აღნიშნა, წარმოდგენილი სცენარის მიხედვით, გროვდება, დაახლოებით, 2.5 მილიარდი ფინანსური რესურსი იმისთვის, რომ საჭიროების შემთხვევაში ბიუჯეტი მზად იყოს შესაბამისი ხარჯების გასაწევად.
„ვალი რა თქმა უნდა გვეზრდება, წლის ბოლოსთვის, მისი მაჩვენებელი 55%-ს გადააჭარბებს. ეს კარგი არ არის, თუმცა, ჩვენ ვალი ავიღეთ იმისთვის, რომ ქვეყანა სრულად ყოფილიყო დაზღვეული როგორც უფრო ღრმა ეკონომიკური კრიზისის, ისე პანდემიის გაგრძელების შემთხვევაში. წარმოდგენილი სცენარის მიხედვით, ჩვენ 2.5 მილიარდის ოდენობის ფინანსურ რესურსს ვაგროვებთ და თუ დაგვჭირდა მეტი თანხის მობილიზება, ბიუჯეტი ამისთვის მზად იქნება. თუმცა, ვიმედოვნებთ, რომ მეორე ტალღა არ იქნება უფრო რთული. ჩვენ ეს რეზერვი უნდა გამოვიყენოთ მომდევნო წლებში ვალის შემცირებისთვის. ვფიქრობთ, ეს არის პიკი და ჩვენ მომდევნო 2-3 წელიწადში, ვალის მოცულობას მშპ-სთან მიმართებაში მნიშვნელოვნად შევამცირებთ და 55%-იანი ზღვრიდან 50%-ზე დაბლა ჩამოვალთ,“ - აღნიშნა ფინანსთა მინისტრის მოადგილემ, გიორგი კაკაურიძემ.
კანონმდებლობით სახელმწიფო ვალი მშპ-ის 60%-ს არ უნდა სცდებოდეს, ბიუჯეტის დეფიციტი 3%-ს, თუმცა საგანგებო მდჰომარეობისთვის არსებობს გამონაკლისის დაშვებაც და წელს დეფიციტი 8.5%-ს მიაღწევს. მთლიანი ვალი მიუახლოვდება, მაგრამ არ გადააჭარბებს დადგენილ ზღვარს. კორექტირებული ბიუჯეტი ეკონომიკის 4%-იან ვარდნაზეა გათვალისწინებული.
