მთავარი

ძიება

ვიდეო

ქვიზები

კონტაქტი

სახელმწიფო ვალის მოცულობა მშპ-ს 60%-ს არ გადასცდება

საგარეო ვალი

ფინანსთა მინისტრის მოადგილის გიორგი კაკაურიძის განცხადებით მთავრობის მიერ გაანალიზებული ყველა შოკის პირობებში სახელმწიფო ვალის მოცულობა მშპ-ს 60%-ს არ გადასცდება.

„მთავრობის ვალი მთლიან შიდა პროდუქტთან მიმართებაში, დაახლოებით 56%-მდე ადის, ჩვენ ბიუჯეტის გადამუშავებულ ვერსიასთან ერთად, წარმოვადგინეთ ვალის მდგრადობის ანალიზი. ყველა შოკი გაანალიზებულია და ყველა შოკის პირობებში ვალის მოცულობა მშპ-სთან მიმართებით 60%-იან ზღვარს არ სცდება. თუმცა, ჩვენ ასევე ვითვალისწინებთ ვალუტის გაუფასურების შოკს, რომელიც შეიძლება იყოს მთავარი რისკი.“ აღნიშნა ფინანსთა მინისტრის მოადგილემ.

გიორგი კაკაურიძის განმარტებით მშპ-სთან მიმართებაში ვალი პიკს 2020 წელს მიაღევს, მომდევნო წლებიდან კი კლება დაიწყება. „რაც შეეხება მომდევნო წლების ვალის შემცირების დინამიკას - ჩვენ ვალი ავიღეთ იმისთვის, რომ ბიუჯეტი სრულად იყოს მზად როგორც უფრო რთული ეპიდემიოლოგიური სიტუაციისთვის, ისე უფრო ღრმა ეკონომიკური კრიზისისთვის. იმედი გვაქვს, რომ ეს არ მოხდება და წელს არ იქნება საჭიროება ეს თანხები სრულად ავითვისოთ. უკვე მომდევნო წლიდან მნიშვნელოვნად შევამცირებთ ვალის აღების ტენდენციას. 2021 წელს გასასტუმრებელი გვაქვს 500 მილიონი დოლარის ოდენობის ევრობონდები, რომელიც გაცილებით მაღალი საპროცენტო განაკვეთით გვაქვს აღებული, ვიდრე მიმდინარე წელს აღებული ვალი. ჩვენ ამ რესურსს გამოვიყენებთ, მათ შორის, სწორედ ამ ვალის გადასაფარად და მომდევნო წელს, მოგვიწევს ნაკლები ვალის აღება. ჩვენ მომდევნო წელს მინიმუმ 3 %-ით შევამცირებთ დეფიციტს. 2023 წლამდე და შემდგომ წლებშიც, დეფიციტის კონტროლი იქნება ის მთავარი მიმართულება, რაც ვალის ეტაპობრივი შემცირების საშუალებას მოგვცემს,“ - განაცხადა ფინანსთა მინისტრის მოადგილემ, გიორგი კაკაურიძემ.