კორონავირუსის პანდემიის გამო აშშ–ის პრეზიდენტმა დონალდ ტრამპმა ხელი მოაწერა კანონს, შეერთებული შტატების ეკონომიკისთვის $2,2 ტრილიონიანი დახმარების შესახებ.
ამის შესახებ ტრამპი ტვიტერზე წერს.
„ეს წუთია მოვაწერე ხელი CARES Act-ს – ამერიკის ისტორიაში ეკონომიკური დახმარების უმსხვილეს პაკეტს. $2,2 ტრილიონიანი კანონი ჩვენი ქვეყნის ოჯახებსა და ბიზნესს დაეხმარება“, – წერს ტრამპი.
კერძოდ, კანონის თანახმად, ამერიკელები, რომელთა წლიური შემოსავალი $75 000–ს არ აღემატება გარკვეულ კომპენსაციას მიიღებენ. მცირე ბიზნესის დასახმარებლად $367–მილიარდიანი პროგრამა შეიქმნება, ხოლო $500 მილიარდი ეკონომიკის სხვადასხვა დარგებს, შტატებს და ქალაქებს მოხმარდება.
27 მარტის მდგომარეობით, აშშ–ში კორონავირუსით ინფიცირებულთა რაოდენობამ 100 000–ს გადააჭარბა.