მთავარი

ძიება

ვიდეო

ქვიზები

კონტაქტი

თურნავა: მზად ვართ, მეზღვაურების როტაციის პროცესში სატრანზიტო ქვეყნის ფუნქცია შევასრულოთ

მინისტრის მადლობა სახმელეთო საზღვრის თანამშრომლებს

საქართველო მზადაა, 15 ივნისიდან უსაფრთხოების სპეციალური ზომების დაცვით, მეზღვაურთა როტაცია - რეპატრიაციის პროცესში სატრანზიტო ქვეყნის ფუნქცია შეასრულოს. ამის შესახებ ეკონომიკის მინისტრმა ნათია თურნავამ განაცხადა.

მინისტრის თქმით, საქართველომ გაითვალისწინა საერთაშორისო საზღვაო ორგანიზაციის (IMO) და ჯანდაცვის მსოფლიო ორგანიზაციის (WHO) გაიდლაინები და სპეციალური მოთხოვნები შეიმუშავა, რომელიც მკაცრი უსაფრთხოების ნორმების მიუხედავად, მნიშვნელოვნად ამარტივებს ქვეყნის ტერიტორიაზე მეზღვაურთა გადაადგილების პროცესს. დამუშავდა სპეციალური წესები ქვეყანაში მეზღვაურების მიღება/გაცილებისა და საკარანტინე სივრცეში გადაყვანისათვის.

„საქართველოს ხელსაყრელი გეოგრაფიული მდებარეობა აქვს, გლობალური პანდემიის ფონზე ქვეყანაში არსებული დაბალი და მკაცრად კონტროლირებადი ეპიდემიოლოგიური ვითარების გათვალისწინებით კი ჩვენი მზაობა, გავხდეთ სატრანზიტო ქვეყანა მეზღვაურებისთვის, დააინტერესებს საერთაშორისო გემთმფლობელებს, რადგან მეზღვაურთა როტაცია დღესაც მნიშვნელოვან გამოწვევად რჩება“, - განაცხადა მინისტრმა.  

ეკონომიკის სამინისტროს ინფორმაციით, მსოფლიოში დაახლოებით 1.2 მილიონი მეზღვაურია, რომლებიც 65,000 გემზე მსახურობენ. ეკიპაჟის შეცვლა ბოლო 2 თვის განმავლობაში შეჩერებულია. საერთაშორისო საზღვაო პალატის (International Chamber of Shipping) მონაცემების მიხედვით, სადღეისოდ 300,000 მეზღვაურის როტაციაა საჭირო.

"პანდემიის გამო მსოფლიოში შექმნილი ვითარება რისკის ქვეშ აყენებს მეზღვაურების ჯანმრთელობასა და უსაფრთხოებას, ხოლო სამომავლო უმოქმედობა გავლენას იქონიებს სასიცოცხლოდ მნიშვნელოვანი ტვირთების დროულად გადაზიდვებზე.

მინისტრის ბრძანების თანახმად ეკიპაჟის ცვლილების პროცესს ორგანიზებასა და კოორდინაციას საზღვაო ტრანსპორტის სააგენტო გაუწევს", - აცხადებენ უწყებაში.