კობა გვენეტაძემ სსფ-ის რეგიონული ეკონომიკური მიმოხილვის პრეზენტაციაში მიიღო მონაწილეობა
1588082476
საქართველოს ეროვნული ბანკის პრეზიდენტმა, სსფ-ის "რეგიონული ეკონომიკური მიმოხილვა: კავკასია და ცენტრალური აზია", ონლაინ პრეზენტაციაში მიიღო მონაწილეობა. პრეზენტაციისას ყურადღება გამახვილდა იმ ეკონომიკურ ზიანზე, რაც COVID-19-ისა და ნავთობის გლობალური ფასების მკვეთრი კლების შედეგად კავკასიისა და ცენტრალური აზიის რეგიონის ქვეყნებს მიადგათ.
მიმართვის დასაწყისში ეროვნული ბანკის პრეზიდენტმა საერთაშორისო სავალუტო ფონდის მხარდაჭერისა და ოპერატიული ფინანსური დახმარების მნიშვნელობაზე ისაუბრა და სსფ-ს თანამშრომლობისათვის მადლობა გადაუხადა.
"იმისათვის რომ მზად ვყოფილიყავით ნეგატიური შოკებისთვის, გასულ წლებში, ჩვენ მივმართავდით საერთაშორისო სავალუტო რეზერვების დაგროვების პოლიტიკას, რაც სხვადასხვა ტრიბუნებიდან დისკუსიის საგანი არაერთხელ იყო. სწორედ რეზერვების დაგროვების პოლიტიკამ მოგვცა საშუალება, შეგვემცირებინა ფასებთან და ფინანსურ სტაბილურობასთან დაკავშირებული რისკები", - განაცხადა კობა გვენეტაძემ.
პრეზენტაციისას ასევე, იმსჯელეს არსებული გაურკვევლობის ფონზე ახალ გამოწვევებზე, შოკების თავისებურებებზე, საპასუხო რეაგირებაზე და სამომავლო პერსპექტივაზე.
კობა გვენეტაძემ ღნიშნა რეგიონული ინტეგრაციისა და სავაჭრო არხების მნიშვნელობა დღევანდელ ვითარებაში. "უნდა ვაღიაროთ, რომ არსებული ჩაკეტილობა ნათელი დასტურია, თუ როგორი არაეფექტური და დამანგრეველია ჩაკეტილი ეკონომიკის პირობებში ცხოვრება". ამასთანავე, ეროვნული ბანკის პრეზიდენტმა ყურადღება გაამახვილა ქვეყნის შიგნით ეკონომიკური გუნდის კოორდინირებული მუშაობის მნიშვნელობაზე.
კობა გვენეტაძესთან ერთად ღონისძიებაში მონაწილეობდა ასტანას საერთაშორისო ფინანსური ცენტრის მმართველი, ყაზახეთის ეროვნული ბანკის ყოფილი პრეზიდენტი და ყაზახეთის ყოფილი ვიცე-პრემიერი, კაირატ კელიმბეტოვი.
ონლაინ პრეზენტაციის დასასრულს, დისკუსია გაიმართა, რომელსაც დიპლომატიური კორპუსის, საერთაშორისო ორგანიზაციების, ასევე, ეკონომიკური კვლევითი ცენტრების, ბიზნესისა და სამოქალაქო სექტორის წარმომადგენლები დაესწრნენ.
