მთავარი

ძიება

ვიდეო

ქვიზები

კონტაქტი

15 წლის გოგოსთან სქესობრივი კავშირის დამყარებისთვის ბრალდებულს 8 წელი მიესაჯა

საქართველოს გენერალური პროკურატურა

„თექვსმეტი წლის ასაკს მიუღწეველთან სქესობრივი კავშირის დამყარებისა და გარყვნილი ქმედებისთვის ბრალდებულს 8 წლით თავისუფლების აღკვეთა მიესაჯა“, - ამის შესახებ ინფორმაციას საქართველოს პროკურატურა ავრცელებს.

პროკურატურისვე ინფორმაციით, თბილისის საქალაქო სასამართლომ სრულად გაიზიარა ბრალდების მხარის მიერ წარდგენილი მტკიცებულებები და თექვსმეტი წლის ასაკს მიუღწეველთან სქესობრივი კავშირის დამყარებასა და გარყვნილ ქმედებაში ბრალდებული ო.ა. დამნაშავედ ცნო.

„სასამართლოში წარდგენილი მტკიცებულებებით დადასტურდა, რომ ო.ა.-მ 2018 წლის მაისიდან 8 ნოემბრის ჩათვლით წინასწარი შეცნობით 15 წლის გოგონასთან რამდენჯერმე დაამყარა სქესობრივი კავშირი და გარყვნილი ქმედება განახორციელა.

სამართალდამცველებმა ო.ა. სასამართლოს განჩინების საფუძველზე 2019 წლის 21 ივლისს თბილისში დააკავეს. მას 5 ეპიზოდზე ბრალდება საქართველოს სისხლის სამართლის კოდექსის 140-ე მუხლის პირველი ნაწილით (თექვსმეტი წლის ასაკს მიუღწეველთან სქესობრივი კავშირის დამყარება, ხოლო 2 ეპიზოდზე 141-ე მუხლის პირველი ნაწილით (გარყვნილი ქმედება) წარედგინა და აღკვეთის ღონისძიების სახით პატიმრობა შეეფარდა“, - აღნიშნულია განცხადებაში.

იქვე განმარტებულია, რომ  არასრულწლოვნისთვის შესაძლო ზიანის მიყენების თავიდან აცილების მიზნით, გამოძიება მისი ინტერესების გათვალისწინებით დაიგეგმა.

„არასრულწლოვანი დაზარალებულის მართლმსაჯულების პროცესში მონაწილეობის შედეგად შესაძლო ზიანის მიყენების თავიდან აცილების მიზნით, საგამოძიებო და საპროცესო მოქმედებები, არასრულწლოვნის საუკეთესო ინტერესების გათვალისწინებით დაიგეგმა.

თბილისის საქალაქო სასამართლომ ო.ა. სრულად ცნო დამნაშავედ წარდგენილ ბრალდებაში და სასჯელის სახედ და ზომად 8 წლით თავისუფლების აღკვეთა განუსაზღვრა, საიდანაც 5 წელი და 4 თვე განესაზღვრა პენიტენციურ დაწესებულებაში მოხდით, ხოლო 2 წელი და 8 თვე ჩაეთვალა პირობით იმავე გამოსაცდელი ვადით“, - ნათქვამია პროკურატურის მიერ გავრცელებულ ინფორმაციაში.