მეგი ბაქრაძის ადვოკატი: შესაძლოა, ხდება მოწმეებზე ზეწოლა და მათი ჩვენებების შესაბამისობაში მოყვანა
1616663742
მეგი ბაქრაძის ოჯახის უფლებადამცველი, ნინო ამაღლობელი საგამოძიებო უწყებას პროფესიული საქმიანობის განხორციელებაში ხელის შეშლასა და გამოძიების პროცესის გაჭიანურებაში ადანაშაულებს.
როგორც ამაღლობელი აღნიშნავს, ამ დრომდე ადვოკატებს საქმის მასალები სრულად არ გადასცემიათ და მათ აქვთ ეჭვი იმის შესახებ, რომ საგამოძიებო უწყება ახორციელებს ზეწოლას მოწმეებზე, მათი ჩვენებების ერთმანეთთან დაახლოების მიზნით.
„პრაქტიკულად დასაბუთებულად გვაქვს უკვე ეჭვი, რომ პროკურატურა კონკრეტულ მასალებს ამაგრებს საქმეზე, მაგრამ ჩვენთვის გადმოცემული არ არის და იმალება ადვოკატებისთვის კონკრეტული მტკიცებულებები. შესაძლოა, ხდება მოწმეებზე ზეწოლა და მათი ჩვენებების შესაბამისობაში მოყვანა, რისთვისაც საჭიროა გონივრული დრო“ ,- ამბობს ნინო ამაღლობელი.
ადვოკატი ასევე აცხადებს იმასაც, რომ გარდაცვლილი ექთნის ტომოგრაფიაზე დაყრდნობით, მას ორმხრივი პნევმონია ჰქონდა.
მეგი ბაქრაძის ადვოკატები დღეს საგამოძიებო უწყებას შუამდგომლობით მიმართავენ. მათ სურთ გაირკვეს, ჰქონდა თუ არა კლინიკა „იმედს“ საჭირო ინვენტარი ვაქცინაციის შემდეგ, გართულების შემთხვევაში, სათანადო პირველადი დახმარების აღმოსაჩენად.
შეგახსენებთ, რომ 18 მარტს ახალციხეში, კლინიკა „იმედში“, სავარაუდოდ, კორონავირუსის საწინააღმდეგო AstraZeneca-ს ვაქცინის გაკეთების შემდეგ, ახალგაზრდა ექთანს სავარაუდოდ, ანაფილაქსიური შოკი განუვითარდა.
პაციენტი თბილისში, პირველი საუნივერსიტეტო კლინიკის რეანიმაციულ განყოფილებაში 19 მარტს გარდაიცვალა.
