მირიან ნიკოლაძე შსს-ში შეხვედრაზე იმყოფებოდა
1594745308
გიორგი შაქარაშვილის ბიძა და ოჯახის ადვოკატი მირიან ნიკოლაძე შინაგან საქმეთა სამინისტროში შეხვედრაზე იმყოფებოდა. მან უწყების შენობა ცოტა ხნის წინ დატოვა.
როგორც მან ჟურნალისტებს განუცხადა, საგამოძიებო უწყებისგან შეიტყო, რომ საქმეზე ახალი მტკიცებულებები და გარემოებები გამოიკვეთა.
„ჯერჯერობით ოჯახს გამოძიებასთან არავითარი პრეტენზია არ აქვს. ყველაფერს ვარკვევთ ერთად, თავიდან ბოლომდე. ინფორმაცია მაქვს ყველაზე და ყველაფერთან დაკავშირებით, თუმცა ვფიქრობ, რომ ეს საზოგადოების განხილვის თემა არაა“,- აღნიშნა მირიან ნიკოლაძემ.
ცნობისთვის, 19 ივნისს გიორგი შაქარაშვილის ოჯახმა ფეხბურთელის დაკარგვის შესახებ შსს-ს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები, რომელიც 4 დღე გაგრძელდა. მყვინთავებმა ფეხბურთელ გიორგი შაქარაშვილის ცხედარი 21 ივნისს წყალში იპოვეს.
შაქარაშვილის გარდაცვალების საქმეზე 17 პირია დაკავებული.
10 ივლისს პროკურატურამ გარდაცვლილი გიორგი შაქარაშვილის ცხედრის ექსპერტიზის დასკვნა გაავრცელა, რომლის თანახმად გიორგი შაქარაშვილის სიკვდილის მიზეზია ასფიქსია წყალში დახრჩობით.
საქმეზე გამოძიება დამამძიმებელ გარემოებებში ჯგუფურად განზრახ მკვლელობის, ჯგუფურად ძალადობის ორგანიზებისა და მასში მონაწილეობის და თავისუფლების უკანონო აღკვეთის მუხლებით მიმდინარეობს.
