ფეხბურთელის გარდაცვალების საქმის პროკურორი: გამოძიებისთვის სრულყოფილი ინფორმაცია მოწოდებული არ არის
1593354770
„გამოძიების ეტაპზე ბრალდებულების მხრიდან არ იყო სრულყოფილი ინფორმაცია მოწოდებული, ეს არ არის სრულყოფილი თანამშრომლობა“, - ამის შესახებ ფეხბურთელ გიორგი შაქარაშვილის გარდაცვალების საქმის პროკურორმა დავით ყაზარაშვილმა ჟურნალისტებს განუცხადა.
როგორც პროკურორმა აღნიშნა, არსებობდა იმის საფუძველი, რომ მოსამართლეს აღკვეთის ღონისძიების სახით პატიმრობა გამოეყენებინა.
„დანაშაულის სიმძიმიდან და სპეციფიკიდან გამომდინარე, არსებობდა იმის საფუძვლები, რომ ბრალდებული პიროვნებების გათვალისწინებით, ასევე მათი მოქმედებების და სხვა უამრავი ქმედების გათვალისწინებით, რომელიც საქმის მასალებით დგინდებოდა, მოსამართლეს გამოეყენებინა აღკვეთის ღონისძიების სახით პატიმრობა. საფრთხეები არსებობდა როგორც მიმალვის, ასევე ახალი დანაშაულის ჩადენის და მტკიცებულებების განადგურების. ეს არ არის უბრალოდ სიტყვები, ეს ყველაფერი გამომდინარეობს საქმის მასალებიდან. რაც შეეხება თანამშრომლობას, ეს არ არის სრულყოფილი თანამშრომლობა, რასაც ბრალდებულები გამოძიების ეტაპზე აკეთებდნენ. სრულყოფილი ინფორმაცია არ არის მოწოდებული გამოძიებისთვის“, - აღნიშნა პროკურორმა.
ცნობისთვის, 19 ივნისს გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები, რომელიც 4 დღე გაგრძელდა. მყვინთავებმა ფეხბურთელ გიორგი შაქარაშვილის ცხედარი წყალში იპოვეს. შაქარაშვილის გარდაცვალების საქმეზე 17 პირი დააკავეს. დაკავებულებს ედავებიან ხულიგნობას, დანაშაულის შეუტყობინებლობას, ძალადობას, ძალადობის ორგანიზებას, მასში მონაწილეობას, რასაც თან ახლდა რბევა, იარაღის გამოყენება, სახელმწიფო წარმომადგენლებისადმი წინააღმდეგობის გაწევა. გიორგი შაქარაშვილის გარდაცვალების საქმეზე დაკავებულ 17-ვე პირს აღკვეთის ღონისძიების სახით წინასწარი პატიმრობა შეეფარდა.
