ფეხბურთელის საქმეზე დაკავებულების ადვოკატი: ბრალდების მხარის დასაბუთება შაბლონურია
1593343305
„ბრალდების მხარის დასაბუთება შაბლონური მიდგომაა“, - ამის შესახებ 19 წლის ფეხბურთელის გიორგი შაქარაშვილის საქმეზე დაკავებული არჩილ გაგნიძისა და ვასილ მახარაძის უფლებადამცველმა ალექანდრე კობაიძემ განაცხადა.
ადვოკატის თქმით, ბრალდების მხარეს წერილობითაც არ წარმოუდგენია ის შუამდგომლობა, რაც წესით, სავალდებულო ხასიათისაა.
„სავალდებულოა, რომ ბრალდების მხარემ წერილობითი ფორმით წარმოადგინოს თუ რის საფუძველზე ითხოვს აღკვეთის ღონისძიების ყველაზე მკაცრი პატიმრობის გამოყენებას. ასევე, გასათვალისწინებელია ის ფაქტი, რომ მათ 10 წუთში ჩამოაყალიბეს საფრთხეები, თურმე რა საფრთხეებიც არსებობს, ყველა ბრალდებულის მიმართ. ეს არის მიმალვის, მოწმეებზე ზემოქმედებისა და შესაძლო მძიმე დანაშაულის საფრთხე, რომ თურმე ჩვენ დავემალებით გამოძიებას. რა თქმა უნდა, ეს არის ბუტაფორია და აბსტრაქცია“, - აღნიშნა კობაიძემ.
ცნობისთვის, 19 ივნისს გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები, რომელიც 4 დღე გაგრძელდა. მყვინთავებმა ფეხბურთელ გიორგი შაქარაშვილის ცხედარი წყალში იპოვეს. შაქარაშვილის გარდაცვალების საქმეზე 17 პირი დააკავეს. დაკავებულებს ედავებიან ხულიგნობას, დანაშაულის შეუტყობინებლობას, ძალადობას, ძალადობის ორგანიზებას, მასში მონაწილეობას, რასაც თან ახლდა რბევა, იარაღის გამოყენება, სახელმწიფო წარმომადგენლებისადმი წინააღმდეგობის გაწევა.
27 ივნისს შაქარაშვილის გარდაცვალების საქმეზე დაკავებულ 17-ვე პირს ბრალი წაუყენეს.
