ფეხბურთელის საქმეზე ერთ-ერთი დაკავებულის ადვოკატი: კადრებში ადამიანების იდენტიფიცირება შეუძლებელია
1593332725
„გავრცელებულ კადრებში ადამიანების იდენტიფიცირება პრაქტიკულად შეუძლებელია“, - ამის შესახებ ფეხბურთელ გიორგი შაქარაშვილის საქმეზე ერთ-ერთი დაკავებულის გიგა ტატიაშვილის ადვოკატმა გიორგი ყიფშიძემ განაცხადა.
უფლებადამცველის თქმით, მათი მოთხოვნაა საერთოდ არ იქნას გამოყენებული აღკვეთის ღონისძიება.
„ვითხოვთ, საერთოდ არ იქნას გამოყენებული არანაირი აღკვეთის ღონისძიება, რადგან აბსოლუტურად უდანაშაულო ადამიანია გამოკეტილი გისოსებს მიღმა. გავრცელებულ კადრებში ადამიანების იდენტიფიცირება, პრაქტიკულად შეუძლებელია. პროცესის დასრულების შემდეგ უფრო სიღრმისეულად გავეცნობით მასალებს. თუმცა, ცალსახად შემიძლია გითხრათ, არცერთი მოწმე და არავინ არ ადასტურებს, რომ რაიმე ტიპის დანაშაული ჩაიდინა, განსაკუთრებით ძალადობა და მითუმეტეს ორგანიზება რაიმე ტიპის ძალადობის“, - აღნიშნა ადვოკატმა.
ცნობისთვის, 19 ივნისს გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები, რომელიც 4 დღე გაგრძელდა. მყვინთავებმა ფეხბურთელ გიორგი შაქარაშვილის ცხედარი წყალში იპოვეს. შაქარაშვილის გარდაცვალების საქმეზე 17 პირი დააკავეს. დაკავებულებს ედავებიან ხულიგნობას, დანაშაულის შეუტყობინებლობას, ძალადობას, ძალადობის ორგანიზებას, მასში მონაწილეობას, რასაც თან ახლდა რბევა, იარაღის გამოყენება, სახელმწიფო წარმომადგენლისადმი წინააღმდეგობის გაწევა.
