19 წლის ფეხბურთელის ბიძა, ადვოკატი მირიან ნიკოლაძე აცხადებს, რომ გიორგი შაქარაშვილს ჯერ ფიზიკურად გაუსწორდნენ, შემდეგ მდინარეში ჩაახრჩვეს და წყლის ნაკადს გაატანეს.
რა მოტივით შეიძლება მოეკლათ გიორგი შაქარაშვილი? - ამასთან დაკავშირებით მირიან ნიკოლაძე ამბობს, რომ არსებობს რამდენიმე მოტივი. ერთ-ერთი ვერსიაა ეჭვიანობის ნიადაგზე დაპირისპირება. თუმცა, არსებობს კიდევ რამდენიმე ვერსია, რომელიც ჯერ არ გაჟღერებულა და შესაძლოა ისინი უფრო რეალური აღმოჩნდეს.
„მოტივი მოცემულ შემთხვევაში შეიძლება ყოფილიყო ე.წ. სტანდარტული, საგამოძიებო თვალსაზრისით. „სტანდარტული“ მოტივი გახლავთ ის, რომ შეიძლება ადამიანმა იფიქროს, ყველაზე ბანალურია და ამ დროს აღმოჩნდეს ყველაზე რეალური. არის რა თქმა უნდა მოტივები, რომლებზეც ვფიქრობთ, რომ ისინიც თანაბარი შესაძლებლობის მატარებლები არიან. ვერ დავაკონკრეტებ ვერცერთ მოტივს, ვინაიდან მოცემულ ეტაპზე გამოძიებისთვის ერთ-ერთი მნიშვნელოვანი საკითხია ის, რომ გამოკვლეული იყოს ზუსტად“,- განაცხადა მირიან ნიკოლაძემ „ტვ პირველის“ ეთერში.
ცნობისთვის, 19 ივნისს გიორგი შაქარაშვილის ოჯახმა ფეხბურთელის დაკარგვის შესახებ შსს-ს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები, რომელიც 4 დღე გაგრძელდა. მყვინთავებმა ფეხბურთელ გიორგი შაქარაშვილის ცხედარი წყალში იპოვეს.
შაქარაშვილის გარდაცვალების საქმეზე 17 პირი დააკავეს. დაკავებულებს ედავებიან ხულიგნობას, დანაშაულის შეუტყობინებლობას, ძალადობას, ძალადობის ორგანიზებას, მასში მონაწილეობას, რასაც თან ახლდა რბევა, იარაღის გამოყენება, სახელმწიფო წარმომადგენლისადმი წინააღმდეგობის გაწევა.
10 ივლისს პროკურატურამ გარდაცვლილი გიორგი შაქარაშვილის ცხედრის ექსპერტიზის დასკვნა გაავრცელა, რომლის თანახმად გიორგი შაქარაშვილის სიკვდილის მიზეზია ასფიქსია წყალში დახრჩობით.
ამავდროულად, პროკურატურის ინფორმაციით, გიორგი შაქარაშვილის ცხედარზე აღინიშნება სიკვდილის წინა ახლო პერიოდში მკვრივი-ბლაგვი საგნის მოქმედებით მიყენებული, სიცოცხლისდროინდელი დაზიანებები შუბლის/თავის, ორივე თვალბუდის, ზედა და ქვედა ტუჩის მიდამოებში, მარჯვენა იდაყვის სახსრისა და მარჯვენა წინამხრის მიდამოებში, აგრეთვე მუცლის, საზარდულის, ბოქვენის, წელისა და ორივე დუნდულოს მიდამოებში.
ექსპერტიზის დასკვნის მიხედვით, აღნიშნული დაზიანებები, იზოლირებულად აღებული, ატარებენ სხეულის დაზიანებათა მსუბუქი ხარისხის ნიშნებს.