დღეს, 16 სექტემბერს გიორგი შაქარაშვილის საქმეზე გამართულ სასამართლო პროცესზე ერთ-ერთმა ბრალდებულმა გიგა ტატიაშვილმა ბრალდებისა და დაცვის მხარის კითხვებს დეტალურად უპასუხა.
ბრალდებულმა დეტალურად მოყვა თუ რა მოხდა ავტომაგისტრალზე და დაადასტურა, რომ მისმა თანმხლებმა პირებმა გიორგი ქათამაძე სცემეს. მაგრამ კონკრეტულად ვინ მონაწილეობდა ჩხუბში, ბრალდებული ამას ვერ იხსენებს.
გიგა ტატიაშვილმა სასამართლო სხდომაზე განაცხადა, რომ რკინის ხელკეტი ნამდვილად ჰქონდა ნიკა ჟვანიას და მან კოკო ღიბრაძის მიმართულებით მოიქნია ის.
მან ასევე განაცხადა, რომ შაქარაშვილის და მისი მეგობრების ადგილმდებარეობისა და გადაადგილების შესახებ წინასწარ არაფერი იცოდნენ.
ტატიაშვილმა ასევე თქვა, რომ მისი ავტომობილის ყველა მგზავრი მონაწილეობდა დაპირისპირებაში და ჩხუბის შეწყვეტის მიზნით მან დაიძახა, რომ პოლიცია მოდიოდა, რის შემდეგაც მათ შეწყვიტეს ჩხუბი და ჩასხდნენ ავტომობილში.
ინფორმაციისთვის, მიმდინარე წლის 19 ივნისს ახალგაზრდა სპორტსმენის გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. 4-დღიანი სამძებრო სამუშაოების შემდეგ, გიორგი შაქარაშვილის ცხედარი წყალში იპოვეს. შაქარაშვილის გარდაცვალების საქმეზე 17 პირია დაკავებული.