შინაგან საქმეთა მინისტრის პირველმა მოადგილემ კახა საბანაძემ მონაწილეობა მიიღო ევროკავშირის წარმომადგენლებთან გამართულ შეხვედრაში. ინფორმაციას შსს-ს პრესსამსახურის წარმომადგენელი ავრცელებს.
„შინაგან საქმეთა მინისტრის პირველმა მოადგილემ, კახაბერ საბანაძემ მონაწილეობა მიიღო შეხვედრაში, რომლის ფარგლებშიც, ევროპულმა მხარემ ქართულ მხარეს ევროკავშირსა და საქართველოს შორის ახალი, 2021-2027 წლების ასოცირების დღის წესრიგის პროექტი წარუდგინა. ასოცირების დღის წესრიგი, რომელიც სხვადასხვა თემატურ მიმართულებას მოიცავს, 2014 წელს საქართველო-ევროკავშირს შორის ხელმოწერილი ასოცირების შეთანხმების ეფექტიან იმპლემენტაციას უწყობს ხელს.
შეხვედრაზე კახაბერ საბანაძემ ხაზი გაუსვა ასოცირების შესახებ შეთანხმების განხორციელების მნიშვნელობას და ამ კუთხით შინაგან საქმეთა სამინისტროს ძალისხმევასა და ჩართულობას“, - აღნიშნულია გავრცელებულ ინფორმაციაში.
როგორც ცნობილია, ევროკავშირის მხრიდან შეხვედრაში მონაწილეობდნენ ევროპული საგარეო ქმედებათა სამსახურის, რუსეთის, აღმოსავლეთ პარტნიორობის, ცენტრალური აზიის, რეგიონული თანამშრომლობის და ეუთოს დირექტორატის ხელმძღვანელი - ლუკ დევინი; ევროკავშირის დელეგაციის ხელმძღვანელი, ელჩი -კარ ჰერცელი და ევროკომისიის სხვა წარმომადგენლები.
ქართული მხრიდან შეხვედრას მოდერაციას უწევდა საგარეო საქმეთა მინისტრის პირველი მოადგილე - ვახტანგ მახარობლიშვილი. ღონისძიებაში, ასევე, მონაწილეობდნენ სხვადასხვა უწყების მაღალი დონის წარმომადგენლები.