აშშ სომხეთსა და აზერბაიჯანს მოლაპარაკებისკენ მოუწოდებს
1594828675
ამერიკა სომხეთსა და აზერბაიჯანს საზღვრისპირა რეგიონში ვითარების დეესკალაციისა და მოლაპარაკების განახლებისკენ მოუწოდებს. ამის შესახებ ამერიკის სახელმწიფო მდივანმა მაიკ პომპეომ ბრიფინგზე განაცხადა.
„შეერთებული შტატები ღრმად შეშფოთებულია სომხეთისა და აზერბაიჯანის საერთაშორისო საზღვარზე სამხედრო დაპირისპირების გამო. სამძიმარს ვუცხადებთ ყველა დაღუპულის ოჯახს და მოვუწოდებთ მხარეებს დაუყოვნებლივ მოახდინონ ვითარების დეესკალაცია და განაახლონ მნიშვნელოვანი დიალოგი ცეცხლის შეწყვეტის შესახებ, მინსკის ჯგუფთან ერთად“,- აღნიშნა მაიკ პომპეომ.
აზერბაიჯანი-სომხეთის საზღვარზე მხარეებს შორის ცეცხლი 12 ივლისს გაიხსნა. ქვეყნებმა ერთმანეთი „ცეცხლის შეწყვეტის შესახებ“ ხელშეკრულების დარღვევაში დაადანაშაულეს. დაღუპულთა რაოდენობამ ორივე მხრიდან 16-ს მიაღწია.
სახელმწიფოთა უმრავლესობამ კონფლიქტის გამო შეშფოთება გამოთქვა. მათ მხარეებს ცეცხლის შეწყვეტისა და დიალოგის განახლებისკენ მოუწოდეს. გამონაკლისი თურქეთი აღმოჩნდა, რომელმაც აზერბაიჯანს ღიად დაუჭირა მხარი, რაც თავის მხრივ, სომხეთის პრემიერის ნიკოლ ფაშინიანის აღშფოთების მიზეზი გახდა.
