ოკუპირებული აფხაზეთის ე.წ. ჯანდაცვის სამინისტროს ინფორმაციით, რეგიონში მცხოვრებ 16 წლის გოგოს კორონავირუსით რეინფიცირება დაუფიქსირდა. ამის შესახებ „ეხო კავკაზა“ იუწყება.
„ჩვენ Covid19-ის რეინფიცირების ლაბორატორიულად დადასტურებული შემთხვევა გვაქვს. პირველად ამ გოგომ საავადმყოფოს 2020 წლის 6 ოქტომბერს მიმართა. მაშინ მას დაავადების მსუბუქი ფორმა ჰქონდა. გაუქრა ყნოსვა. PCR ტესტის ჩატარების შემდეგ კორონავირუსული ინფექცია დაუდასტურა" - განაცხადა ოკუპირებული აფხაზეთის მთავარმა სანიტარულმა ექიმმა ლიუდმილა სკორიკმა.
მისი თქმით, 14-დღიანი მკურნალობის შემდეგ პაციენტს განმეორებითი ტესტირება ჩაუტარდა და კორონავირუსი აღარ დაუდასტურდა.
15 დეკემბერს კი გოგონას კვლავ COVID 19-ის სიმპტომები დაუდგინდა. მას ტესტირება ჩაუტარეს და ვირუსის არსებობა კვლავ დაუდასტურდა. ექიმების ინფორმაციით, მისი მდგომარეობა დამაკმაყოფილებელია.
ცნობისთვის, პანდემიის დაწყებიდან ოკუპირებულ აფხაზეთში კორონავირუსის 8011 შემთხვევა დადასტურდა. 102 ადამიანი გარდაიცვალა, ხოლო 6173 - გამოჯანმრთელდა.
იხილეთ აგრეთვე:
🔅 თურქეთში ოკუპირებული აფხაზეთის საბანკო ბარათის გამოყენება დაუშვეს