ცხინვალი დავით ქაცარავას მადლობას უხდის
1613051526
ცხინვალის დე ფაქტო უშიშროების კომიტეტი ქართულ არასამთავრობო ორგანიზაციებს, რომლებიც ე.წ. საზღვართან აქციებს მართავენ, მადლობას უხდის. მათი ინფორმაციით, ახალგორის რაიონის სოფელ ახმაძთან 13 თებერვალს დაგეგმილი აქცია, რომელიც დავით ქაცარავას ინიციატივით ტარდება, „სამხრეთ ოსეთის ინტერესებს შეესაბამება“. ინფორმაციას სააგენტო ‘სპუტნიკი“ ავრცელებს.
„ქართული პატრიოტულად განწყობილი არასამთავრობო ორგანიზაციები სასაზღვრო ზონის მონიტორინგს ახორციელებენ და ქართულ საზოგადოებას საქართველოსა და სამხრეთ ოსეთის საზღვრის შესახებ ინფორმაციას აწვდიან. სწორედ ასეთი აქციის ჩატარება იგეგმება 13 თებერვალს ახალგორის რაიონის სოფელ ახმაძთან, სადაც დავით ქაცარავა სახელმწიფო საზღვრის ხაზს აჩვენებს. ასეთი ქმედებები ხელს შეუწყობს სახელმწიფო საზღვრის დარღვევის ფაქტების შემცირებას და ქართულ საზოგადოებაში შეგნების დონეს აამაღლებს. უშიშროების კომიტეტი ამ ქმედებებს დადებითად აფასებს" - განაცხადეს ცხინვალის ე.წ. უშიშროების კომიტეტში.
ე.წ. კომიტეტში ასევე აცხადებენ, რომ რამდენიმე დღის წინ „სამხრეთ ოსეთის მესაზღვრეებმა საქართველოს პოლიციის თანამშრომლის მცდელობა დააფიქსირეს, რომელიც რესპუბლიკის ტერიტორიაზე შეღწევას ცდილობდა“. ამის შესახებ ე.წ. უშიშროების კომიტეტში სააგენტო „სპუტნიკს“ განუცხადეს.
ამ უწყების განცხადებით, ინციდენტი სოფელ დესეუს მიმდებარედ მოხდა. ამ ინფორმაციის მიხედვით, ქართველი პოლიციელი 20 მეტრით ე.წ. სამხრეთ ოსეთის ტერიტორიაზე გადავიდა და „სასაზღვრო“ ზონაზე თვალთვალს ახორციელებდა.
ე.წ. უშიშროების კომიტეტს აქვს ინფორმაცია, რომ საქართველოს ძალოვანი უწყებების ხელმძღვანელებმა ამ რაიონებში ქართული დივერსიული ჯგუფები გაააქტიურეს, რაც პირდაპირი შეტაკებების საფრთხეს ქმნის.
იხილეთ აგრეთვე:
🔰 ენგურის ხიდი გაიხსნა - რამდენ დღიანი კარანტინი იმოქმედებს გადმომსვლელთათვის?
🔰 ე.წ. სამხრეთ ოსეთში ქართული ნომრებით ავტომანქანებს რეგისტრაციის უფლება მისცეს
