მთავარი

ძიება

ვიდეო

ქვიზები

კონტაქტი

ირაკლი ღარიბაშვილი: თავდაცვის ძალები ნებისმიერი სცენარისთვის მზად არის

თავდაცვის მინისტრი

თავდაცვის მინისტრის ირაკლი ღარიბაშვილის განცხადებით, ქვეყანაში კორონავირუსის გავრცელების პროცესის ნებისმიერი სცენარისთვის უწყება სრულ მზადყოფნაშია.

„ჩვენ, ვინაიდან ქვეყნის თავდაცვაზე პასუხისმგებელი უწყება ვართ და უნდა ვიზრუნოთ თავდაცვისუნარიანობაზე, ყოველთვის წინ უნდა ვიხედებოდეთ. ერთი-ორი ნაბიჯით წინ უნდა ვიყოთ მოვლენებთან მიმართებაში. სწორედ აქედან გამომდინარე, ჩემი ხელმძღვანელობით სამინისტროში პრევენციული ღონისძიებები გატარდა, გაიწერა ყველა გეგმა, ყველაზე ცუდი სცენარისთვისაც კი. ეს მიუთითებს იმაზე, რომ ჩვენ მზად უნდა ვიყოთ ნებისმიერი სცენარისთვის. ეს არის ჩვენი პირდაპირი ვალდებულება და პასუხისმგებლობა“, - განაცხადა ირაკლი ღარიბაშვილმა.

პანდემიის გავრცელების პრევენციის ღონისძიებების ფარგლებში მინისტრმა თავდაცვის ძალების მაქსიმალურ მობილიზებას, ორგანიზებულობას, მუდმივ მზადყოფნასა და დისციპლინირებას გაუსვა ხაზი. მისი თქმით, ქართველი სამხედროების პროფესიონალიზმი და მზადყოფნა მუდმივი წვრთნებისა და ტრენინგების შედეგია, რომელსაც ისინი ნატოს წევრი ქვეყნების სტანდარტების შესაბამისად გადიან.

როგორც მინისტრმა აღნიშნა, მსოფლიო გამოწვევა ამავდროულად შესაძლებლობაა, ამ შესაძლებლობის გამოყენება არის ჩვენი მთავარი ამოცანა, აღნიშნული პროცესები კი, სასარგებლო დასკვნების გამოტანის შესაძლებლობას იძლევა.