მთავარი

ძიება

ვიდეო

ქვიზები

კონტაქტი

საქართველოს თავდაცვის ძალების წარმომადგენლებმა პარასპორტის 8 სახეობაში მონაწილეობა მიიღეს და 41 მედალი მოიპოვეს

ქართველი სამხედროები

25 ოქროს, 10 ვერცხლის და 6 ბრინჯაოს მედალი - ასეთია ამერიკის შეერთებული შტატების "საზღვაო ქვეითთა კორპუსის თამაშებში" ქართველი დაჭრილ-დაშავებული სამხედრო მოსამსახურეების ასპარეზობის შედეგები. 

აღნიშნულს საქართველოს თავდაცვის უწყება ავრცელებს.

უწყების ცნობით, პარასპორტის 8 სახეობაში საქართველოს თავდაცვის ძალებმა 41 მედალი მოიპოვეს და 8 სახეობაში მონაწილეობა მიიღეს.

ქართველმა სამხედროებმა 5 ოქროს, 4 ვერცხლის და 1 ბრინჯაოს მედალი აიღეს ტრენაჟორზე ნიჩბოსნობაში. მჯდომარე ფრენბურთის გუნდმა წარმატებით იასპარეზა. მისმა წევრებმა პირველი ადგილი და ოქროს მედლები მოიპოვეს.

ოქროს მედალოსნები გახდნენ ველოსპორტში მონაწილე ქართველი სამხედრო მოსამსახურეები - ალუდა სეთურიძე, ირაკლი კუჭუხიძე და ლაშა ადეიშვილი.

"სპორტის ამ სახეობაში ქართველმა სამხედრო მოსამსახურეებმა ერთი ვერცხლისა და ერთი ბრინჯაოს მედალიც მოიპოვეს. წარმატებული შეჯიბრი იყო ბირთვის სროლაში, რომელშიც თემურ დადიანი და თენგო შუბითიძე - ოქროს, მანუჩარ ნაყიშაშვილი - ვერცხლის, სანდრო ხუჯაძე კი, ბრინჯაოს მედალოსნები გახდნენ. ორი ოქროსა და სამი ვერცხლის მედალი აიღეს სხვადასხვა დისტანციაზე სირბილში ქართველმა სამხედრო მოსამსახურეებმა. წარმატებულად იასპარეზეს საქართველოს თავდაცვის ძალების წარმომადგენლებმა სროლაშიც, რომელშიც ერთი ოქროს, ერთი ვერცხლისა და ორი ბრინჯაოს მედალი მოიპოვეს. ძალოსნობაში (115კგ) ოქრო, ცურვაში კი ბრინჯაოს მედალი აიღო კაპრალმა თემურ დადიანმა", - აცხადებენ სამინისტროში.

ცნობისთვის, კალიფორნიაში გამართული "საზღვაო ქვეითთა კორპუსის თამაშების" დახურვის ცერემონიალი დღეს გაიმართება. აღნიშნულ შეჯიბრში სხვადასხვა ქვეყნის 300 დაჭრილ-დაშავებულ სამხედრო მოსამსახურესთან ერთად მონაწილეობა მიიღო საქართველოს თავდაცვის სამინისტროს 16-კაციანი გუნდმა.

"საზღვაო ქვეითთა კორპუსის თამაშებში" ქართველი სამხედრო მოსამსახურეები 2014 წლიდან იღებენ მონაწილეობას.

გასულ წელს სამხედრო მოსამსახურეებმა 38 მედლის მოპოვება შეძლეს.