ჩინეთი კორონავირუსის გავრცელების საწინააღმდეგოდ აბრუნებს მკაცრ რეგულაციებს
1623325657
ვარაუდობენ, რომ ჩინეთში პანდემიის მკაცრი საკარანტინო წესები და შეზღუდვები მომავალ წელსაც შეიძლება გაგრძელდეს, რადგან აღნიშნული ქვეყანა ებრძვის კორონავირუსის ახალ მუტაციურ ვარიანტებს - ინფორმაციას New York Times ავრცელებს.
პეკინში არის ათასობით საკარანტინო უბანი. დღეში მილიონობით ტესტირება ტარდება, რაც შეეხება საზღვარგარეთიდან ჩამოსულ მგზავრებს, მათ რეგულაციების მიხედვით კარანტინში ყოფნა რამდენიმე კვირის განმავლობაში მოეთხოვებათ.
ჩინეთი ერთ წელზე მეტია ებრძვის პანდემიას, ვირუსის ახალმა მუტაციურმა ვარიანტებმა კი, შეიძლება ამ ქვეყნის დღის წესრიგი კიდევ რამდენიმე ხნის განმავლობაში შეცვალოს.
მიუხედავად იმისა, რომ ჩინეთში ვაქცინირებულთა რაოდენობის დიდი მაჩვენებელია, ჩნდება კითხვები იმის შესახებ, შეუძლია თუ არა ჩინურ ვაქცინებს კორონავირუსის ახალი ვარიანტების დამარცხება.
ინფიცირების დიდი მაჩვენებელია გუანჯოუში, სამხრეთ პროვინციის გუანგდონგის დედაქალაქში.
გუანჯოუს სამედიცინო ობიექტები ფუნქციონირებენ 24 საათის განმავლობაში, მოხალისეები და სამედიცინო პერსონალი დასვენების გარეშე მუშაობდნენ.
ჩინეთის კორონავირუსის რეგულაციები დადგინდა მას შემდეგ, რაც ვირუსი პირველად გაჩნდა, მაშინ პეკინმა მკაცრი შეზღუდვები დააწესა ასობით მილიონი ადამიანისთვის. დღეს არსებული რეგულაციები ორიენტირებულია კონკრეტულ უბნებზე და არა სრულიად ქალაქებზე ან პროვინციებზე. ჩინეთმა ვაქცინაცია თავისი სტრატეგიის ცენტრად აქცია.
მიუხედავად ამისა, მჭიდროდ დასახლებულ ქვეყანაში შეზღუდვები კვლავ ძალაში რჩება: ესაა გაფართოებული ტესტირება, გადაადგილების მკაცრი შეზღუდვები და სხვა ქვეყნებიდან ჩამომსვლელთათვის ინტენსიური ტესტირება.
ბიზნესის წარმომადგენლები აღნიშნავენ, რომ საერთაშორისო მოგზაურთათვის ამ შეზღუდვებმა შეიძლება ხელი შეუშალოს მათ გეგმებს.
ჩინეთში ჩასვლის შემდეგ, მოგზაურებმა მინიმუმ ორი კვირა და ზოგჯერ სამი ან მეტი უნდა გაატარონ მთავრობის მიერ კონტროლირებად კარანტინში, მაშინაც კი, თუ ისინი სრულად არიან აცრილნი.
ქვეყანამ შეიძლება შეინარჩუნოს მოგზაურობის მკაცრი შეზღუდვები თებერვლის ჩათვლით, პეკინის ზამთრის ოლიმპიურ თამაშებამდე და შესაძლოა მომავალი წლის შემოდგომამდეც, როდესაც ჩინეთის კომუნისტური პარტია გამართავს პარტიის კონგრესს.
ჩინეთში მყოფი მრავალი უცხოელი არჩევანის წინაშე დგას: თუ ისინი გადაწყვეტენ მეუღლეებთან, შვილებთან და ოჯახის სხვა წევრებთან ერთად ქვეყნის დატოვებას მოგზაურობის მიზნით, მათ შეიძლება შემდგომში აღარ შეეძლოთ ქვეყანაში შესვლა პანდემიური შეზღუდვების გამო.
ქვეყნის ლიდერები მოსახლეობას ვაქცინაციისკენ მოუწოდებენ. მთავრობის ინფორმაციით, დაახლოებით 800 მილიონი ადამიანია ვაქცინირებული. ჩინეთის ვაქცინების ერთ – ერთმა მთავარმა მწარმოებელმა Sinovac Biotech– ის თავმჯდომარემ და აღმასრულებელმა დირექტორმა იინ ვეიდონგმა განაცხადა, რომ ჩინეთის მარეგულირებელმა ორგანოებმა დაამტკიცეს ვაქცინების გადაუდებელი გამოყენება 3 წლის ასაკში ბავშვებში.
მიუხედავად ვაქცინის 800 მილიონი დოზის მიღებისა - თითქმის ყველა ვაქცინა მოითხოვს ორ დოზის გაკეთებას- ეს ნიშნავს, რომ ჩინეთის მოსახლეობის ძირითადი ნაწილი სრულად ვაქცინირებული არ არის. ზოგი ადამიანი კი ყოყმანობს.
ვირუსის გავრცელებამ ახალი კითხვები წარმოშვა ჩინური ვაქცინების ეფექტურობის შესახებ, განსაკუთრებით კი მუტაციური ვარიანტების შესახებ. გასულ თვეში სეიშელის კუნძულებს და მონღოლეთს ინფიცირების მაღალი მაჩვენებელი ჰქონდა, მიუხედავად მაღალი ვაქცინაციის მაჩვენებლის. ორივემ „სინოფარმის“ ვაქცინა გამოიყენა ჩინეთიდან, თუმცა სეიშელის კუნძულები ასევე ეყრდნობოდა AstraZeneca-ს ვაქცინებს.
ვირუსის დელტას ვარიანტმა, რომელიც ახლა გუანჯოუში ვრცელდება, აჩვენა, რომ სხვა ქვეყნებში შესაძლებელია უკვე აცრილი ზოგიერთი ადამიანის დააინფიციროს.
ორი დოზის შემდეგ, როგორც ჩანს, AstraZeneca-ს ვაქცინით აცრის შემთხვევაში ეფექტურობა 60 %-მდე იზრდება და Pfizer-BioNTech-ის შემთხვევაში 88 %-მდე.
ჩინელმა მკვლევარმა იინმა განაცხადა, რომ მისი კომპანიის ვაქცინის მესამე დოზის მიღება ანტისხეულების ერთ კვირაში ათჯერ გაზრდას იწვევს, მაგრამ ჩინელი ვაქცინების მწარმოებლები ჯერ არ ურჩევენ მესამე დოზას.
იხილეთ აგრეთვე:
✅ვაქცინირებული პირები ევროკავშირის ქვეყნებში უპრობლემოდ მოგზაურობას შეძლებენ
✅„ფაიზერის“ ვაქცინა ბრიტანული და აფრიკული შტამების წინააღმდეგ საკმაოდ ეფექტურია - The New York Times
