გიორგი ვოლსკი ევროკავშირის სპეციალურ წარმომადგენელს, ტოივო კლაარს შეხვდა
1614333041
პარლამენტის თავმჯდომარის პირველი მოადგილე გიორგი ვოლსკი სამხრეთ კავკასიასა და საქართველოში კრიზისის საკითხებში ევროკავშირის სპეციალურ წარმომადგენელს, ტოივო კლაარს დახურულ ფორმატში შეხვდა, - ამის შესახებ ინფორმაციას საქართველოს პარლამენტის პრესსამსახური ავრცელებს.
უწყების ცნობით, მხარეებმა ისაუბრეს საქართველოში მიმდინარე პოლიტიკურ პროცესებზე, ჟენევის საერთაშორისო მოლაპარაკებებთან დაკავშირებულ საკითხებზე და სამხრეთ კავკასიის რეგიონში არსებულ მდგომარეობაზე.
პრესსამსახურის თქმით, როგორც შეხვედრის დასრულების შემდეგ, პარლამენტის თავმჯდომარის პირველმა მოადგილემ, გიორგი ვოლსკიმ განაცხადა, ბოლო პერიოდში, საქართველოს მოქალაქეების მიმართ განხორციელებულმა უკანონო ქმედებებმა, განსაკუთრებით კი, ცხინვალის დე ფაქტო სასამართლოს მიერ საქართველოს მოქალაქის მიმართ გამოტანილმა უკანონო გადაწყვეტილებამ არსებული რთული ურთიერთობები კიდევ უფრო დაძაბა.
„მიუხედავად ამისა, გამყოფი ხაზების ორივე მხარეს მცხოვრებ საზოგადოებებს შორის არის გარკვეული კავშირები და ამ კავშირების გაღრმავება და გააქტიურება მომავლისათვის ძალიან მნიშვნელოვანი იქნება“, - აღნიშნა გიორგი ვოლსკიმ.
