გურამ ნიკოლაშვილი: ბიძინა ივანიშვილის მთავარი დონაცია სახელმწიფოს წინაშე წარმოდგენილი მმართველი გუნდი და დემოკრატიის ხარისხია
1586445312
„ბიძინა ივანიშვილმა თავისი ქცევით მოახერხა და დაგვანახა, როგორ მუშაობს „ქართული ოცნების“ გუნდი ეფექტურად და დამოუკიდებლად, როგორ გაიზარდა სამოქალაქო თვითშეგნება, როგორ ერთიანდება ხალხი გასაჭირში, ბიზნესი და საჯარო სექტორი“, - განაცხადა ტვ „იმედის“ „დღის ქრონიკაში“ საჯარო პოლიტიკის სპეციალისტმა გურამ ნიკოლაშვილმა.
ნიკოლაშვილის თქმით, მთავარი დონაცია სახელმწიფოს წინაშე სწორედ ეს არის - წარმოდგენილი მმართველი გუნდი და დემოკრატიის ხარისხი.
„მიუხედავად იმისა, რომ ბიძინა ივანიშვილი მმართველი პარტიის თავმჯდომარე და ქვეყნის უმდიდრესი ადამიანია, განვლილ კრიზისულ პერიოდშიც კი არ დამცხრალა კრიტიკა მის მიმართ. სწორედ ამიტომ, ვფიქრობ, ეს დონაცია უფრო შინაარსიანი გზავნილია, ვიდრე უბრალოდ ფულის გადარიცხვა. ეს არის მკაფიო პასუხი არსებულ კრიტიკაზე, სახელმწიფო უფრო მეტია, მისი ინსტიტუციები და დამოუკიდებელი ფუნქციონირების უნარი, ვიდრე ერთი, თუნდაც ყველაზე დიდი ძალაუფლების მქონე ადამიანი. ბიძინა ივანიშვილმა თავისი ქცევით მოახერხა და დაგვანახა, როგორ მუშაობს „ქართული ოცნების“ გუნდი ეფექტურად და დამოუკიდებლად, როგორ გაიზარდა სამოქალაქო თვითშეგნება, როგორ ერთიანდება ხალხი გასაჭირში, ბიზნესი და საჯარო სექტორი. მას არ უცდია პოლიტიკური ქულების დაწერა, განსაცდელის დაწყებისთანავე იმ მნიშვნელოვანი პროცესის საკუთარი რესურსით გადაფარვა, რომელსაც უკვე ორი თვეა გავდივართ. ვფიქრობ, მისი მთავარი დონაცია სახელმწიფოს წინაშე სწორედ ეს არის - წარმოდგენილი მმართველი გუნდი და დემოკრატიის ხარისხი. გადარიცხული თანხის სიდიდე კი მეორეხარისხოვანია, დამოუკიდებლობის მოპოვებიდან განვლილი 30 წლის მანძილზე მას არაერთი ასეთი 100 მილიონი შეუწირავს ქართული სახელმწიფოსთვის“, - განაცხადა გურამ ნიკოლაშვილმა.
მისივე თქმით, კორონავირუსის გავრცელების საწინააღმდეგო ფონდს არაერთმა მოქალაქემ და ბიზნესსტრუქტურამ შესწირა თანხა.
„მთლიანად 25 მილიონი ლარი შეგროვდა. „ქართული ოცნების“ გუნდმა და საჯარო სექტორმა ხელფასების მესამედი გაიღეს ფონდისთვის. დღეს კი მთლიან შეგროვილ თანხაზე ოთხჯერ მეტი, ასი მილიონი ლარი ფონდისთვის ბიძინა ივანიშვილის ოჯახმა გაიღო“, - განაცხადა გურამ ნიკოლაშვილმა.
ინფორმაციისთვის, პოლიტიკური გაერთიანება „ქართული ოცნება - დემოკრატიული საქართველოს“ თავმჯდომარის, ბიძინა ივანიშვილის ოჯახმა StopCoV ფონდში 100 მილიონი ლარი ჩარიცხა.
StopCoV ფონდის ანგარიშზე ამ დროისთვის 124 543 899 ლარია მობილიზებული.
StopCoV ფონდი მარტის დასაწყისში შეიქმნა და მასში აკუმულირებული თანხა იდენტიფიცირებული საჭიროებების დასაკმაყოფილებლად მიემართება.
