მთავარი

ძიება

ვიდეო

ქვიზები

კონტაქტი

ირაკლი ღარიბაშვილი: ბოლო 30 წლის განმავლობაში ასეთი მასშტაბური ინფრასტრუქტურული პროექტები თავდაცვის სისტემაში არ განხორციელებულა

თავდაცვის მინისტრი 2020

თავდაცვის მინისტრის ირაკლი ღარიბაშვილის განცხადებით, თავდაცვის სისტემაში მასშტაბური პროექტები ხორციელდება.

„ბოლო 30 წლის განმავლობაში ასეთი მასშტაბური ინფრასტრუქტურული პროექტები თავდაცვის სისტემაში არ განხორციელებულა. მე ვგულისხმობ ყველა ობიექტის, დაახლოებით 250 ობიექტის სრულ რეაბილიტაციას, ბაზების კეთილმოწყობასა და ყველა შენობის სრულ რეაბილიტაციას ნატოს სტანდარტების შესაბამისად. ეს იქნება სრული განახლება თავდაცვის სისტემაში. ამას გარდა, ჯარისკაცების ეკიპირება და აღჭურვა შესაბამისი სტანდარტის აღჭურვილობით, კვება, სამედიცინო დაზღვევა, ხელფასები თუ საბინაო პოლიტიკა - ყველა მიმართულებით ჩვენ გვაქვს პროგრესი“, - განაცხადა ირაკლი ღარიბაშვილმა.

მინისტრის თქმით, ინფრასტრუქტურული პროექტები არ შეჩერდება და მაისის ბოლომდე ამ ობიექტებზე 5000-მდე თანამშრომელი დასაქმდება.

„სამუშაოები საქართველოს მასშტაბით ყველა რეგიონში გაიშლება - 60 ლოკაცია, 250 ობიექტი. ეს პროცესი გავმიჯნეთ და ამ ადამიანებს არანაირი შეხება არ ექნებათ ჯართან, რათა მაქსიმალურად დავიცვათ ჩვენი სამხედროების ჯანმრთელობა“, - აღნიშნა მინისტრმა.

როგორც ირაკლი ღარიბაშვილმა განაცხადა, ინფრასტრუქტურული სამუშაოები წლის ბოლომდე დასრულდება და ამისთვის 100 მილიონი ლარია გამოყოფილი. მან ასევე განმარტა, რომ მისი ერთ-ერთი ამოცანა ჯარისკაცის ფორმისა და აღჭურვილობის სტანდარტის მაქსიმალურად გაუმჯობესებაა.

„ორ თვეში, მაისში, ჩვენი ჯარისკაცები ჩაიცვამენ გერმანულ, ყველაზე მაღალი ხარისხის ფეხსაცმელს, რომელიც აცვია გერმანულ ჯარს. საუბარია ისეთი ბრენდების ფეხსაცმელებზე, როგორიცაა “ლოვა” და “ჰაიქსი”. ფორმები კი, ნატოს სტანდარტის იქნება. გამოიკვეთა კომპანია, რომელიც ისეთი ცნობილი ბრენდებისთვის კერავდა როგორიცაა გუჩი, ლუი ვიტონი და სხვები. შეიძლება ამ კომპანიასთან ჩვენ გავაფორმოთ სტრატეგიული ხელშეკრულება, მიმდინარეობს მოლაპარაკებები. მქონდა სურვილი, რომ ადგილობრივი წარმოება განვითარებულიყო, მაგრამ ადგილზე სამწუხაროდ ვერ მომაწოდეს იმ ხარისხის ფორმები, როგორიც ჩვენ გვინდოდა. ამიტომ ჩვენ თურქეთში შევუკვეთეთ ნატოს სტანდარტების შესაბამისი ფორმები“,- აღნიშნა ირაკლი ღარიბაშვილმა.