დღეს, 23 იანვარს „ქართული ოცნების“ პოლიტ საბჭოს სხდომა გაიმართა. პარტიის მმართველი ორგანო მიმდინარე მოვლენებზე დახურულ კარს მიღმა დაახლოებით 2 საათის განმავლობაში მსჯელობდა.
ბიძინა ივანიშვილის პოლიტიკიდან წასვლის შემდეგ ეს პირველი სხდომაა, რომელიც განახლებული და გაფართოებული შემადგენლობით გაიმართა.
შეხვედრას ახალი თავმჯდომარე ირაკლი კობახიძე ხელმძღვანელობდა.
სხდომის დასრულების შემდეგ მამუკა მდინარაძემ ჟურნალისტებთან ისაუბრა:
„პარტიის რიგგარეშე ყრილობის შემდეგ დღეს გაიმართა საბჭოს სხდომა რომელმაც აირჩია პარტიის სამდივნო. აგრეთვე გაცნობებთ, რომ ჩვენ საუბარი გვქონდა პარტიის საორგანიზაციო საკითხებზე და სამომავლო გეგმებზე.
სამდივნოს შემადგენლობა ასეთია:
გენერალური მდივანი - კახა კალაძე;
პოლიტიკური მდივანი - ირაკლი ღარიბაშვილი;
საერთაშორისო მდივანი - კახა კუჭავა;
რეგიონალური მდივანი - დიმიტრი სამხარაძე;
აღმასრულებელი მდივანი ვიქნები მე - მამუკა მდინარაძე. ესაა პოლიტ საბჭოს გადაწყვეტილება “- განაცხადა მამუკა მდინარაძემ.