მთავარი

ძიება

ვიდეო

ქვიზები

კონტაქტი

საბჭოთა ოკუპაციის 100 წლისთავთან დაკავშირებით საქართველოს საგარეო საქმეთა სამინისტროს ორგანიზებით ონლაინ ღონისძიებები გაიმართება

 საბჭოთა ოკუპაციის 100 წლისთავთან დაკავშირებით საქართველოს საგარეო საქმეთა სამინისტროს ორგანიზებით ონლაინ ღონისძიებები გაიმართება

საბჭოთა ოკუპაციის 100 წლისთავთან დაკავშირებით დაგეგმილი ღონისძიებების ფარგლებში, ონლაინ - შეხვედრა გაიმართება ქართული ისტორიული დიასპორის წარმომადგენლებთან, კერძოდ ემიგრაციაში წასული პირველი რესპუბლიკის მთავრობის შთამომავლებთან, - ამის შესახებ ინფორმაციას საგარეო საქმეთა სამინისტროს პრესსამსახური ავრცელებს. 

პრესსამსახურის ცნობით, ღონისძიებაში მონაწილეობას მიიღებენ საგარეო საქმეთა სამინისტროს ხელმძღვანელობა, ისტორიული და თანამედროვე დიასპორის წარმომადგენლები, ქართველი და უცხოელი მეცნიერები, რომლებიც მიმოიხილავენ საქართველოს პირველი დემოკრატიული რესპუბლიკის ისტორიულ - პოლიტიკურ ასპექტებს.

მათი თქმით, დაინტერესებულ საზოგადოებას საშუალება ეძლევა შეხვედრას თვალი ადევნოს სამინისტროს Facebook გვერდის მეშვეობით.

უწყების ცნობით, საბჭოთა ოკუპაციის 100 წლისთავთან დაკავშირებით დაგეგმილი ღონისძიებების ფარგლებში, საგარეო საქმეთა მინისტრის მოადგილე ლაშა დარსალია საქართველოში აკრედიტებული დიპლომატიური კორპუსის წარმომადგენლებს წაუკითხავს ონლაინ -ლექციას საბჭოთა რუსეთის მიერ საქართველოს ოკუპაციასთან დაკავშირებით და ასევე ისაუბრებს რუსეთის ფედერაციის მხრიდან დღეს მიმდინარე ოკუპაციასა და არსებულ გამოწვევებზე.

მათი თქმით, ოკუპაციის დღესთან დაკავშირებით, გაიმართება ონლაინ-გამოფენა, რომელიც დაინტერესებულ მნახველს სთავაზობს ფოტო და საინფორმაციო მასალას საქართველოს პირველი დემოკრატიული რესპუბლიკისა და საქართველოს ოკუპაციის თემაზე.

გამოფენის ხილვა შესაძლებელია ასევე საგარეო საქმეთა სამინისტროს და საზღვარგარეთ საქართველოს დიპლომატიური წარმომადგენლობების Facebook გვერდებზე.

საზღვარგარეთ საქართველოს დიპლომატიური მისიები დაინტერესებულ საზოგადოებას ასევე შესთავაზებენ საბჭოთა ოკუპაციის მუზეუმის ვირტუალურ ტურს.

საბჭოთა ოკუპაციის დღესთან დაკავშირებით სახელმწიფო დროშები დაეშვება სამინისტროს შენობასა და საზღვარგარეთ საქართველოს დიპლომატიური მისიების შენობებზე.

ინფორმაციისთვის, 1921 წლის 25 თებერვალს თბილისი მე-11 წითელმა არმიამ დაიკავა. საქართველო რუსული საბჭოთა იმპერიის ნაწილად იქცა.

დამოუკიდებლობის დაკარგვას მოჰყვა სასტიკი რეპრესიები, პოლიტიკური პარტიების აკრძალვა, ათასობით ადამიანის დახვრეტა, ხანგრძლივი პატიმრობა და გადასახლება.

დამოუკიდებლობის დასაცავად საქართველოს მოქალაქეების ბრძოლა ხუთი კვირა მიმდინარეობდა.

25 თებერვალს დაწყებული საბჭოთა ოკუპაცია 70 წელს გაგრძელდა.