მთავარი

ძიება

ვიდეო

ქვიზები

კონტაქტი

შალვა პაპუაშვილი: ოპონენტებს ახლა ელჩების გულწრფელობაში ეპარებათ ეჭვი, უტევენ ყველას, ვინც მათ პოზიციას არ ეთანხმება

„ქართული ოცნება-დემოკრატიული საქართველოს“ საარჩევნო სიის წევრი შალვა პაპუაშვილი - Pia.ge

„სამწუხაროდ, ოპონენტების მხრიდან მიმდინარეობს შეტევა ყველა იმ ადამიანზე, ვინც მათ პოზიციას არ ეთანხმება“, - ამის შესახებ „ქართული ოცნების“ საარჩევნო სიის წევრმა შალვა პაპუაშვილმა განაცხადა.

მისი თქმით, ამ შემთხვევაში ოპონენტებისთვის ასეთი ადამიანები გახდნენ ელჩები.

შალვა პაპუაშვილი საქართველოში აშშ-ისა და ევროკავშირის ელჩებთან დაკავშირებით „ნაციონალური მოძრაობის“ წევრ ნიკა მელიას 1-ელ დეკემბერს გაკეთებულ განცხადებას გამოეხმაურა.

„სამწუხაროდ, ჩვენმა ოპონენტებმა გამოყვეს კიდევ ერთი ჯგუფი, რომელიც მათი შეტევის მიზანი გახდა. ამ შემთხვევაში, ელჩები არიან და მათ გულწრფელობაში ეპარებათ ეჭვი. ვხედავთ, რომ სხვადასხვა ჯგუფს ამოიღებენ მიზანში, მიდის მათზე შეტევა, ყველაზე, ვინც არ ეთანხმება მათ პოზიციას. ამ არჩევნებიდან ერთი თვის განმავლობაში დავინახეთ, რომ დედამიწის ზურგზე ვერ ნახეს ვერც ერთი საერთაშორისო ორგანიზაცია, ვერც ერთი სადამკვირვებლო მისია, ვინც მათ პოზიციას გაიზიარებდა, ეს ნამდვილად ფაქტია.

ნახეთ, ეუთო/ოდირის ხელმძღვანელის მიმართ როგორი შეტევა განხორციელდა, რადგან მათ პოზიციას არ იზიარებდა, ნახეთ როგორი შეტევა ხორციელდებოდა სხვადასხვა პოლიტიკოსი თუ რამეს გამოთქვამდა. ახლა ვნახეთ ელჩების მიმართ. მე მგონი, ყველამ უნდა გავაკეთოთ დასკვნა, როდესაც ყველა მტყუანია და მარტო ისინი არიან მართალი, აქ უნდა დავფიქრდეთ, იქნებ, პირიქით არის საქმე“, – აღნიშნა შალვა პაპუაშვილმა.

„ნაციონალური მოძრაობის“ წევრის ნიკა მელიას განცხადებით, შემთხვევითი არ არის ის, რომ მისი და რამდენიმე ადამიანის სასამართლო პროცესები განაახლეს. ნიკა მელიას შეფასებით, ეს არის ვაჭრობის პროცესის გახსნა, რაც ხდება იმ ფონზე, როცა ელჩების ჩართულობით მოლაპარაკებები მიმდინარეობს. ნიკა მელია ამბობს, რომ შექმნილ ვითარებასთან დაკავშირებით ელჩების პოზიციას ელოდება.

„თუ ჩვენ ვხედავთ საზოგადოების უდიდესი ნაწილი, მთელი არასამთავრობო სექტორი, პოლიტიკური ოპოზიციური პარტიები, და რაც მთავარია, ხალხი, ქვეყანაში არჩევნები არ ჩატარდა, თუ ვხედავთ, ქვეყანა იმართება ერთპიროვნულად არაფორმალური მმართველის მიერ, ის, რომ დრო და დრო თავისუფალი მედია იდევნება, ადამიანები ტყვეობაში აჰყავთ, შემდეგ გევაჭრებიან, ეს ყველაფერი თუ არ არის დანახული ნებისმიერი ელჩის მხრიდან, ის მეუბნება, რომ ეს ასე არ ხდება, მე მგონი, უბრალოდ მაქვს უფლება, არ დავეთანხმო ჩემი ქვეყნის მიმართ ასეთი ელჩის გულწრფელ ქომაგობაში“, – განაცხადა მელიამ.