მთავარი

ძიება

ვიდეო

ქვიზები

კონტაქტი

ენმ საკონსტიტუციო ცვლილებების განხილვაში მონაწილეობას არ მიიღებს

ენმ კენჭისრაშ მონაწილეობას არ მიიღებს

საკონსტიტუციო ცვლილებების განხილვაში საპარლამენტო ფრაქცია „ნაციონალური მოძრაობა“ მონაწილეობას არ მიიღებს. ამის შესახებ პარტიის მიერ გავრცელებულ განცხადებაშია აღნიშნული.

„ერთიანი ნაციონალური მოძრაობა კიდევ ერთხელ გამოხატავს მხარდაჭერას საარჩევნო რეფორმასთან დაკავშირებულ საკონსტიტუციო ცვლილებების მიმართ. ვთვლით, რომ შემუშავებული საარჩევნო მოდელი მრავალპარტიული მმართველობის შესაძლებლობებს მნიშვნელოვნად ზრდის. ცვლილებების ეს პაკეტი არის საქართველოს მოქალაქეების, საერთაშორისო პარტნიორების, სამოქალაქო საზოგადოების და ოპოზიციური პოლიტიკური პარტიების ძალისხმევის შედეგი. ნაციონალურ მოძრაობას ამ პროცესში მნიშვნელოვანი როლი მიუძღვის.

ამავე დროს, დემოკრატიის და სამართლიანი არჩევნების პრინციპების ხელშეწყობისათვის აუცილებელია მიღწეული შეთანხმებების შესრულება, მით უფრო, იმ ხელისუფლების პირობებში, რომელმაც თავის საქმიანობის ქვაკუთხედად მოქალაქეების მუდმივი მოტყუება აქცია. მთელი ამ პერიოდის განმავლობაში ჩვენი პოზიცია ეფუძნება ჩვენი ამომრჩევლების ნებას - საკონსტიტუციო ცვლილებებისადმი ჩვენი მხარდაჭერა უპირობო იქნებოდა 8 მარტის შეთანხმების ყველა პუნქტის შესრულებით, კერძოდ პოლიტპატიმარ გიორგი რურუას გათავისუფლებით, რაც სამწუხაროდ ამ მომენტამდე არ მოხდა. საკონსტიტუციო ცვლილებების ჩავარდნის შემთხვევაში, მთელი პასუხისმგებლობა ბიძინა ივანიშვილს და ქართულ ოცნებას დაეკისრება.

ზემოაღნიშნული არგუმენტებიდან გამომდინარე, ნაციონალური მოძრაობის საპარლამენტო ფრაქცია მონაწილეობას არ მიიღებს კენჭისყრაში. ამასთანავე, პატივს ვცემთ სხვა ოპოზიციური ფრაქციების და დამოუკიდებელი დეპუტატების გადაწყვეტილებას საკონსტიტუციო ცვლილებების მხარდაჭერასთან დაკავშირებით“, - ნათქვამია ენმ-ს მიერ გავრცელებულ ინფორმაციაში.

21 ივნისს პარლამენტის რიგგარეშე სხდომა 12:00 საათზე, პლენარულ სხდომათა დარბაზში გაიმართება.

პარლამენტის იურიდიულ საკითხთა კომიტეტის თავმჯდომარის, ანრი ოხანაშვილის თქმით, რიგგარეშე სხდომის ერთ-ერთი მთავარი დატვირთვა საქართველოს კონსტიტუციაში შესატან ცვლილებებზე მსჯელობა იქნება.