საქართველოში საკონსტიტუციო ცვლილებების პირველი მოსმენით მხარდაჭერას საქართველოში ევროკავშირის ელჩი კარლ ჰარცელი"ტვიტერში“ ეხმაურება.
კარლ ჰარცელი იმედოვნებს რომ საბოლოო წარმატების მისაღწევად ყველა მხარე აიღებს პასუხისმგებლობას.
"მე დავითვალე 142 ხმა, რომელიც მხარს უჭერდა 8 მარტის საკონსტიტუციო შეთანხმებას. მივესალმები, რომ პარლამენტმა დღეს 136 ხმით, პირველი მოსმენით დაუჭირა მხარი საკონსტიტუციო ცვლილებებს. ვიმედოვნებ ყველა მხარე აიღებს პასუხისმგებლობას, რომ საბოლოო წარმატება იქნეს მიღწეული,"- წერს ჰარცელი.
პარლამენტმა ახალ საარჩევნო მოდელთან დაკავშირებით საკონსტიტუციო ცვლილების პროექტი პირველი მოსმენით მიიღო. ცვლილებებს მხარი 136-მა დეპუტატმა დაუჭირა.
ცვლილების თანახმად, 2020 წლის საპარლამენტო არჩევნები 120/30-ზე მოდელით და 1%-იანი ბარიერით ჩატარდება. 120/30-ზე მოდელი გულისხმობს, რომ პარლამენტში პროპორციული სიით 120 დეპუტატი შევა, მაჟორიტარი კი 30 იქნება.