მამუკა მდინარაძე გახარიაზე - შეეშინდა და საკუთარი გუნდი ამიტომ მიატოვა, ან შეგნებულად ითამაშა ნაციონალური მოძრაობის თამაში და უღალატა საკუთარ გუნდს
1622976585
საპარლამენტო ფრაქცია „ქართული ოცნების“ თავმჯდომარე მამუკა მდინარაძე აცხადებს, რომ გიორგი გახარიას შეეშინდა და ან შეგნებულად ითამაშა „ნაციონალური მოძრაობის“ თამაში, ეს კი გახდა საკუთარი გუნდის მიტოვების მიზეზი. როგორც ის სოციალურ ქსელში წერს გახარია იბრძვის იმისთვის, რომ საკუთარი გუნდის რამდენიმე დეპუტატი გაიყვანოს საკრებულოში ან „ქართული ოცნება“ ჩამოაცილოს 43 პროცენტიან მაჩვენებელს.
„მათთვის, ვინც ჯერ კიდევ ვერ გაერკვა, ვის მოედანზე თამაშობს გიორგი გახარია:
1„ქართული ოცნების“ პრემიერ-მინისტრი, მისი(ვე) განცხადებით, გადადგა იმიტომ, რომ ნაციონალური მოძრაობის თავმჯდომარის დაკავება ვერ გადაავადა.
2. უკიდურესად დაძაბული და კრიტიკული ვითარების დროს, ეს არ შედიოდა არც სახელმწიფოს, არც „ქართული ოცნების“ ინტერესებში და კიდევ უფრო ამძაფრებდა სიტუაციას.
3. მისი გადადგომა აწყობდა მხოლოდ ნაციონალურ მოძრაობას. მათი რეაქციებიც ამასვე მოწმობდა.
4. თავისი ქმედებით მან საკუთარი გუნდი უდიდესი დარტყმის ქვეშ დააყენა.
5. მისგან დღემდე არ მოგვისმენია რეალური, რაციონალური, დამაჯერებლობის მინიმალური ხარისხის არგუმენტიც კი, - რას შეცვლიდა მელიას დაკავების 2-3 დღით გადადება.
მხოლოდ ორი ვარიანტია:
ეს ყველაფერი ვერ გააანალიზა, შეეშინდა და საკუთარი გუნდი ამიტომ მიატოვა ან შეგნებულად ითამაშა ნაციონალური მოძრაობის თამაში და უღალატა საკუთარ გუნდს. პირადად ჩემთვის (არსებული უტყუარი და ლოგიკური ინფორმაციების გარეშეც კი) პასუხი მარტივია…
რაც შეეხება მომავალს - გახარია იბრძვის იმისთვის, რომ თვითმმართველობის არჩევნებზე: რამდენიმე დეპუტატი გაიყვანოს რამდენიმე რაიონის საკრებულოში ან „ქართული ოცნება“ ჩამოაცილოს 43 პროცენტიან მაჩვენებელს, - ანუ აქაც ნაციონალური მოძრაობის თამაში ითამაშოს.
პასუხი ამ შემთხვევაშიც მარტივია: წარმოუდგენელია ნაციონალებისთვის გადამდგარი გახარიას მისია მისი პარტიის რამდენიმე წარმომადგენლის საკრებულოს წევრობა იყოს.“ - წერს მამუკა მდინარაძე სოციალურ ქსელში.
