მთავარი

ძიება

ვიდეო

ქვიზები

კონტაქტი

ონის რაიონში დაზიანებული ელექტროქსელის აღდგენითი სამუშაოები გრძელდება

ენერგო-პრო ჯორჯიას ლოგო

ონის რაიონში სტიქიის გამო, გამორთული აბონენტების ნაწილისთვის ელექტროენერგიის მიწოდების აღდგენა გუშინ ღამითვე მოხერხდა. ამის შესახებ ინფორმაციას „ენერგო-პრო ჯორჯია“ ავრცელებს.

მათივე ცნობით, ამჟამად, ელექტროენერგია მიეწოდება სოფლებს - ლაგვანთა, საკაო, ხიდეშლები, მაჟიეთი, ბორცო და ბასუკაანთი.

„სს „ენერგო-პრო ჯორჯიას“ ტექნიკური ბრიგადები მუშაობენ საგანგებო რეჟიმში, რომ დროულად მოახდინონ უამინდობის შედეგად დაზიანებული ელექტროგადამცემი ხაზების სრული აღდგენა-რეაბილიტაცია. მიუვალი გზების გამო, ფერხდება სამუშაოების წარმოება, თუმცა, იმ ადგილებში, სადაც არის შესვლის შესაძლებლობა, მობილიზებულია ტექნიკა და სამუშაოები აქტიურად მიმდინარეობს.

ამ დროისთვის, ელექტროენერგია არ მიეწოდება 800-მდე აბონენტს. აქედან, დღეს ჩაირთვება 200-ზე მეტი აბონენტი რამდენიმე სოფელში. აგრეთვე ეტაპობრივად განხორციელდება 600-მდე აბონენტის ენერგომომარაგება სოფლებში უწერა, გლოლა, ღები, ჭიორა და კურორტი შოვი. აღნიშნულ სოფლებში არის ყველაზე მძიმე დაზიანება. ადიდებულმა მდინარე რიონმა წაიღო მაღალი ძაბვის 35 კვ გადამცემი ხაზის საყრდენები. კომპანიის ტექნიკური სამსახური ადგილზეა მობილიზებული და მიმდინარეობს ინტენსიური სამუშაოები, რომ შეძლებისდაგვარად მოკლე ვადაში მოხდეს ზიანის აღდგენა და აბონენტებისთვის ელექტროენერგიის მიწოდება“, - ნათქვამია „ენერგო-პრო ჯორჯიას“ მიერ გავრცელებულ ინფორმაციაში.

რაჭაში ძლიერი წვიმის შედეგად მდინარეები ადიდდა. სტიქიამ 12 სოფელი გარესამყაროს მოწყვიტა. მათ ნაწილთან კომუნიკაცია უკვე აღდგენილია. მიმდინარეობს სტიქიის შედეგების სალიკვიდაციო სამუშაოები.