19 წლის ფეხბურთელის ბიძა მირიან ნიკოლაძე ამბობს, რომ გიორგი შაქარაშვილს ჯერ ფიზიკური შეურაცხყოფა მიაყენეს, შემდეგ მდინარეში ჩაახრჩვეს და წყლის ნაკადს გაატანეს.
„თავად ვერ ჩაიხრჩვებოდა. მას წყლის პანიკური შიში ჰქონდა, არაგვში როგორ შევიდოდა?!“,- განაცხადა მირიან ნიკოლაძემ „ტვ პირველთან“ ეთერში.
ცნობისთვის, 19 ივნისს გიორგი შაქარაშვილის ოჯახმა ფეხბურთელის დაკარგვის შესახებ შსს-ს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები, რომელიც 4 დღე გაგრძელდა. მყვინთავებმა ფეხბურთელ გიორგი შაქარაშვილის ცხედარი წყალში იპოვეს.
შაქარაშვილის გარდაცვალების საქმეზე 17 პირი დააკავეს. დაკავებულებს ედავებიან ხულიგნობას, დანაშაულის შეუტყობინებლობას, ძალადობას, ძალადობის ორგანიზებას, მასში მონაწილეობას, რასაც თან ახლდა რბევა, იარაღის გამოყენება, სახელმწიფო წარმომადგენლისადმი წინააღმდეგობის გაწევა.
10 ივლისს პროკურატურამ გარდაცვლილი გიორგი შაქარაშვილის ცხედრის ექსპერტიზის დასკვნა გაავრცელა, რომლის თანახმად გიორგი შაქარაშვილის სიკვდილის მიზეზია ასფიქსია წყალში დახრჩობით.