მირიან ნიკოლაძე: შეცვლილი ჩვენების მიზეზი შესაძლოა „კაი ბიჭური“ მენტალიტეტი იყოს
1593460801
გიორგი შაქარაშვილის ბიძის მირიან ნიკოლაძის განცხადებით, 19 წლის ფეხბურთელის საქმეზე დაკითხული ადამიანების შეცვლილ ჩვენებას შესაძლოა, ორი საფუძველი ჰქონდეს - პირდაპირი ზეწოლა და არსებული მენტალიტეტი.
ამასთან ნიკოლაძე განმარტავს, რომ გამოძიებაში პირველად მიღებული ჩვენებება ყველაზე სანდოდ ითვლება.
„შეცვლილი ჩვენების ერთი ყველაზე საფუძვლიანი ვერსია შესაძლოა, ზეწოლა იყოს, ხოლო მეორე, შესაძლებელია იყოს ზოგადად არსებული ის ძალიან მძიმე მენტალიტეტი, რაზეც ხშირად არის თქვენს გადაცემებში საუბარი, რომ შესაძლოა, ვიღაცამ ზეწოლა კი არ განახორციელოს, მაგრამ ბავშვი მოექცეს ფსიქოლოგიური ზეგავლენის ქვეშ. მაგალითად ის, რომ არ არის „კაი ბიჭობა”, რომ ვიღაცას ხელი დაადო და შენი ჩვენებით დაიჭირონ. ბუნებრივია, მან დაადო ხელი პირველი ჩვენებით და შესაძლოა, ვიღაცამ ამის რეაბილიტაცია მოინდომოს. როგორც წესი გამოძიებაში პირველად მიცემული ჩვენებები ბევრად რეალურია, ვიდრე შემდეგი“,- ამბობს ნიკოლაძე.
19 ივნისს სპორსტემენ გიორგი შაქარაშვილის ოჯახმა ფეხბურთელის დაკარგვის შესახებ შსს-ს მიმართა. პოლიციამ შეტყობინების მიღებისთანავე დაიწყო სამძებრო სამუშაოები. მყვინთავებმა ფეხბურთელის ცხედარი წყალში 4 დღის შემდეგ იპოვეს.
შაქარაშვილის გარდაცვალების საქმეზე 17 პირი დააკავეს. დაკავებულებს ედავებიან ხულიგნობას, დანაშაულის შეუტყობინებლობას, ძალადობას, ძალადობის ორგანიზებას, მასში მონაწილეობას, რასაც თან ახლდა რბევა, იარაღის გამოყენება, სახელმწიფო წარმომადგენლისადმი წინააღმდეგობის გაწევა.
