„რას წამლავ შენს ხალხს, რას უშვებ ათას ოხრობას სისხლში“ - მეუფე სპირიდონი ვაქცინაციის შესახებ
1617881669
სხალთელმა მთავარეპისკოპოსმა, მეუფე სპირიდონმა ხარების დღესასწაულზე ქადაგების დროს, ქვეყანაში შექმნილ ეპიდვითარებასა და პანდემიის თანმდევ რეკომენდაციებზე ისაუბრა.
სასულიერო პირმა აღნიშნა, რომ მოწოდებები თავყრილობისაგან თავშეკავებისა და ეკლესიაში სიარულისგან თავის არიდების შესახებ, არის ეკლესიის წინააღმდეგ მიმართული და რეალობას მოკლებული.
მან სამედიცინო პერსონალის მიერ გავრცელებულ განცხადებებსა და ვაქცინაციაზეც ისაუბრა. მეუფე სპირიდონის განცხადებით, ვაქცინაცია არის მიუღებელი, მისი სარგებლიანობა კი - მეცნიერულად დაუსაბუთებელი. მისივე თქმით, ვაქციანიის გზით, ცდილობენ ხალხის მიზანმიმართულად მოწამვლას.
სასულიერო პირმა მოუწოდა ტაძარში შეკრებილ საზოგადოებას ეკლესიაში სიარულისა და გავრცელებული რეკომენდაციების იგნორირებისაკენ.
„რას წამლავ შენს ხალხს, რას უშვებ ათას ოხრობას და უბედურებას მის სისხლში, რამდენი ხალხი დაიღუპა. ექიმები ხართ და იმის მაგივრად ხალხს იცავდეთ, გამოდიხართ და ეშმაკისაკენ დევნით ხალხს. თან ეუბნები, ჩუმად, ხმა არ გაიღოო, ვინც ავად გახდა, არ თქვაო. სატანის მოციქული არა ხარ ამის შემდეგ? - აბა ვინ ხარ, შვილო! მაგრამ ვერ მოერევი საქართველოს, ივერია ღვთისმშობლის წილხვედრია, დაგანგრევს დედა ღვთისმშობელი.
შარშანდელ დასაკრავს უკრავენ - არ წახვიდეთ ეკლესიაშიო, სატანსიტები, ეშმაკის მოციქულები. სულ იძახდნენ, არ დაგინახოთ ეკლესიაში წასულნი, თორემ კუბოები იქნებაო, ამბობდნენ ეს ეშმაკის შვილები. გამოვიდა პატრიარქი, მთელი ღამის წირვა აღავლინა ღამის თევით და ჩაცხრა მთლიანად კოვიდი- 3-4 შემთხვევა იყო დღეში, ზოგჯერ სულ არ იყო.
ახლა, დღეს გამოდიან და იძახიან, არ წახვიდეთ ეკლესიაშიო. რატომ?- იმიტომ რომ მათი მამა ეშმაკია, ეშმაკს არ უნდა ეკლესია. არ გაიგონოთ ეშმაკის ძახილი. ჩვენ ეკლესია გადაგვარჩენს, ქრისტეს სისხლი და ხორცი გადაგვარჩენს... თუ ეკლესიაში არ ვიქნებით, ძალიან მძიმე იქნება განსაცდელი, ძალიან მძიმე“,- აღნიშნა მეუფე სპირიდონმა.
აგრეთვე იხილეთ:
📌„ხალხი თუ არ დაგიდგა გვერდში მილიონი კარავი რომც გაშალო, რა?“ - მეუფე იაკობი
📌საპატრიარქო: ილია მეორეს „კომენდანტის საათის“ შესახებ არ უსაუბრია
