მთავარი

ძიება

ვიდეო

ქვიზები

კონტაქტი

„საქართველომ საერთაშორისო არეალზე კიდევ ერთი უდიდესი აღიარება მოიპოვა“ - მარიამ ქვრივიშვილი

ტურიზმის ეროვნული ადმინისტრაციის ხელმძღვანელი მარიამ ქვრივიშვილი

გაეროს მსოფლიო ტურიზმის ორგანიზაციის აღმასრულებელი საბჭოს 112-ე სხდომის გახსნის შემდეგ ეკონომიკისა და მდგრადი განვითარების სამინისტროს ტურიზმის ეროვნული ადმინისტრაციის ხელმძღვანელმა განცხადება გააკეთა. მარიამ ქვრივიშვილმა ღონისძიების მნიშვნელობაზე ისაუბრა. ინფორმაციას ტურიზმის ადმინისტრაციის პრესსამსახურის წარმომადგენელი ავრცელებს.

„დღეს ჩვენთვის მნიშვნელოვანია დღეა, ქვეყნისთვის, რომელიც ტურისტულად ძალიან აქტიურია. საქართველომ საერთაშორისო არეალზე კიდევ ერთი უდიდესი აღიარება მოიპოვა, როგორც ქვეყანამ, რომელიც მსოფლიოში პირველ, უპრეცედენტოდ მაღალი რანგის ღონისძიებას პანდემიის დროს მასპინძლობს. ეს არის მნიშვნელოვანი აღიარება ჩვენი ქვეყნისთვის, ეს ის სწორად გადადგმული ნაბიჯები და წარმატებული ბრძოლის შედეგია, რომელიც საქართველოს მთავრობამ პანდემიის დროს გასწია“, - განაცხადა მარიამ ქვრივიშვილმა.

ტურიზმის ეროვნული ადმინისტრაციის ხელმძღვანელის განცხადებით, მასშტაბური ღონისძიება ხელს შეუწყობს მთელ მსოფლიოში საქართველოს, როგორც უსაფრთხო ქვეყნის იმიჯის გამყარებას.

„დღეს ღონისძიების მსვლელობისას გაეროს მსოფლიო ტურიზმის ორგანიზაციის გენერალური მდივნისგან, დელეგატებისგან მოვისმინეთ არაერთი პოზიტიური შეფასება საქართველოს მიმართ, როგორც პრეცედენტული მოვლენა, რომ ჩვენ ვმასპინძლობთ ასეთ მნიშვნელოვან ღონისძიებას.

გაეროს მსოფლიო ტურიზმის აღმასრულებელი საბჭოს სხდომაზე დასასწრებად 24 ქვეყნიდან 170-მდე დელეგატი ჩამოვიდა. გუშინ საშუალება მოგვეცა მათთვის საქართველოს ტურისტული პოტენციალი გაგვეცნო. ეს მნიშვნელოვანი მიღწევაა, ამ ღონისძიების საქართველოში ჩატარება, რაც ჩვენი ქვეყნის ტურისტულ ინდუსტრიას დაეხმარება მოკლე, საშუალო და გრძელვადიანი პერსპექტივით და ცალსახად გაამყარებს იმ ძალიან ძლიერ მესიჯს, რაც გულისხმობს, რომ საქართველო არის პირველი ქვეყანა მთელი მსოფლიოს მასშტაბით, რომელმაც უმასპინძლა ასეთ მნიშვნელოვან ღონისძიებას ყველა პროტოკოლისა და უსაფრთხოების დაცვით“, - განაცხადა მარიამ ქვრივიშვილმა.