სამტრედიის მუნიციპალიტეტში მაშველებმა შვიდი ადამიანი გადაარჩინა

მაშველებმა სამტრედიის მუნიციპალიტეტში შვიდი ადამიანი გადაარჩინეს. სოფელ გომსა და საჯავახოში მოქალაქეები ადიდებული მდინარე რიონიდან გამოსვლას ვერ ახერხებდნენ. 

უხვმა ნალექმა გომში საცხოვრებელი კოტეჯები დატბორა და იქ მყოფ მოქალაქეებს საფრთხე შეუქმნა. მათ გამოყვანას მაშველები რამდენიმე საათის განმავლობაში ცდილობდნენ. მოქალაქეების ევაკუირება ნავების საშუალებით მოხდა.

საგანგებო სიტუაციების მართვის სამსახურის იმერეთის მთავარი სამმართველოს უფროსის თქმით, უხვი ნალექის მოსვლის შედეგად მდინარე რიონი გადმოვიდა კალაპოტიდან. სოფელ გომიდან შევიდა შეტყობინება, რომ რამდენიმე მოქალაქე ვერ ახერხებდა გამოსვლას უსაფრთხო ადგილზე, მეხანძრე-მაშველების სწრაფი რეაგირების შედეგად მცურავი საშუალებების გამოყენებით მოხდა მოქალაქეების უვნებლად გადმოყვანა.

„ადამიანები, რომლებიც იმყოფებოდნენ საძოვრებზე, მოვარდნილმა წყალმა მოაცილა უსაფრთხო ადგილს და მაშველების რამდენიმე საათიანი მუშაობის შედეგად სპეცტექნიკით მოხდა ადამიანების გამოყვანა. ჩვენ დროულად მოვახდინეთ რეაგირება, რაც შეეხება გზების გაწმენდას, სამუშაოები დამთავრებულია. რამდენიმე ოჯახში შევიდა წყალი, მაგრამ ახლა უკვე წყლის დონე დაწეულია"- განაცხადა იმერეთის სახელმწიფო რწმუნებულმა ზვიად შალამბერიძემ.

იმერეთში ძლიერმა წვიმამ პრობლემები წყალტუბოს, ხარაგაულის, სამტრედიის და ვანის მუნიციპალიტეტებში შექმნა.