სომხეთსა და აზერბაიჯანში საფეხბურთო მატჩები აღარ გაიმართება
1603260309
უეფამ ყარაბაღის კონფლიქტის ფონზე გადაწყვიტა, რომ განუსაზღვრელი ვადით სომხეთსა და აზერბაიჯანში შეაჩეროს საკლუბო და ეროვნული ნაკრებების მატჩების ჩატარება.
„უეფას ფიქრობს, რომ საომარი მდგომარეობიდან გამომდინარე, ამ ქვეყნებში ჩვენი ორგანიზაციის ეგიდით მატჩების გამართვა შეუძლებელია“, – წერია უეფას ოფიციალურ ვებგვერდზე.
ორივე ქვეყნის ფედერაციებსა და კლუბებს შეუძლიათ წარმოადგინონ ალტერნატიული ადგილები უეფას ეგიდით გასამართი საშინაო მატჩებისთვის.
უეფა ასევე აღნიშნავს, რომ მიღებული გადაწყვეტილება არ იმოქმედებს ევრო 2020-ის ფინალური ეტაპის იმ მატჩებზე, რომელიც მომავალი წლის ივნისში ბაქოში უნდა გაიმართოს.
ცნობისთვის, მთიან ყარაბაღში და მოსაზღვრე რაიონებში აზერბაიჯანულ და სომხურ შეიარაღებულ ძალებს შორის საომარი მოქმედებები 27 სექტემბერს განახლდა. ორივე მხრიდან ასობით ადამიანი დაიღუპა და დაიჭრა.
18 ოქტომბერს ბაქო და ერევანი კიდევ ერთხელ ცეცხლის შეწყვეტაზე შეთანხმდნენ, თუმცა მალევე ორივე მხარემ ინფორმაცია გაავრცელა, რომ მოწინააღმდეგემ შეთანხმება დაარღვია.
