5 იანვრის დღიური

PIA.GE-ს დღიური - რუბრიკა, სადაც დღის მნიშვნელოვან ამბებსა და პერსონებს წარმოგიდგენთ.

დღის მთავარი ამბავი

4 ოპოზიციონერი დეპუტატი პარლამენტში შევიდა. მას შემდეგ, რაც პარლამენტმა „პატრიოტთა ალიანსის“ წევრებს ირმა ინაშვილს, გოჩა თევდორაძეს და გიორგი ლომიას დეპუტატის უფლებამოსილება ვადაზე ადრე შეუჩერა, მათი ადგილი დაკავეს ფრიდონ ინჯიამ, გელა მიქაძემ და დავით ზილფიმიანმა. საკანონმდებლო ორგანოში შევიდა აგრეთვე „პატრიოტთა ალიანსის“ წევრი ავთანდილ ენუქიძე.

⏩„პატრიოტთა ალიანსიდან“ წასული დეპუტატები ახალ პარტიას ქმნიან

⏩კობახიძე: „პატრიოტთა ალიანსის“ რუსული შემადგენელი არ შემოვიდა პარლამენტში, ეს მნიშვნელოვანია

⏩კობახიძე: ორპარტიული პარლამენტი საკმარისი არ არის

დღის ფრაზები

თამარ გაბუნია:

მუტაცია შეიძლება სხვაც იყოს და ასე გამოკიდება ყველა მუტაციაზე ძალიან რთული იქნება

პაატა იმნაძე:

წესები ყველგან ერთნაირად უნდა დავიცვათ - ეკლესიაში, სუპერმარკეტში და აქციაზე

არჩილ თალაკვაძე:

ოპოზიცია უკვე წარმოდგენილია სხდომათა დარბაზში

ზურა ჯაფარიძე:

სინამდვილეში კრიზისი არის ადამიანების ტვინებსა და გულებში

დღის კარგი ამბავი

უწყებათაშორის საკოორდინაციო საბჭოს დღევანდელ სხდომაზე ყურადღება გამახვილდა კოვიდვაქცინაციის პროცესის შეუფერხებელი უზრუნველყოფის მიზნით მიმდინარე სამუშაოებსა და ამ თემაზე პრემიერ-მინისტრის დავალებით შექმნილი სპეციალური კომისიის მიერ გადადგმულ ნაბიჯებზე. აღინიშნა, რომ სახელმწიფო, საგარეო საქმეთა სამინისტროსა და საზღვარგარეთ საქართველოს დიპლომატიური მისიების ჩართულობით, აქტიურად აწარმოებს მოლაპარაკებებს საერთაშორისო პარტნიორებთან და ვაქცინის მწარმოებლებთან, რათა ქვეყანამ, ვაქცინის პირველი დოზები, რაც შეიძლება ადრე მიიღოს.

დღის ცუდი ამბავი

დუშეთის მუნიციპალიტეტ სოფელ არაგვისპირში წყლით სავსე თხრილში შუა ხნის ქალის ცხედარია ნაპოვნი. ცნობილია, რომ ქალი ერთ-ერთ ფერმაში მუშაობდა საიდანაც ორი დღის წინ გაუჩინარდა.

სამძებრო ოპერაციის შემდეგ კი 58 წლის ქალის ცხედარი თხრილში იპოვეს. ფერმის მფლობელის განცხადებით, ქალი მასთან 20 წელია მუშაობდა, მისი გაუჩინარების შესახებ პოლიციას არ შეატყობინა, რადგან ხშირად გადიოდა ხოლმე.

დღის უცხოური ამბავი

რუსეთის პრეზიდენტ ვლადიმერ პუტინსა და გერმანიის კანცლერ ანგელა მერკელს შორის სატელეფონო საუბარი შედგა. მათ განიხილეს კორონავირუსის პანდემიასთან ბრძოლის სფეროში თანამშრომლობის საკითხები.

ასევე აქცენტი გაკეთდა ვაქცინების ერთობლივი წარმოების შესაძლო პერსპექტივებზე. შეთანხმდნენ, რომ ამ თემაზე კონტაქტები გაგრძელდება ორი ქვეყნის ჯანდაცვის სამინისტროებსა და სხვა სპეციალიზირებულ სტრუქტურებს შორის.

აგრეთვე განიხილეს უკრაინის შიდა შეთანხმების ზოგიერთი ასპექტი, პირველ რიგში, მინსკის "ღონისძიებათა პაკეტის" განხორციელებისა და "ნორმანდიის" სამიტების დროს მიღწეული შეთანხმებების კონტექსტში.

დღის ფოტო

ზექიე მჟავანაძეს 109 წელი შეუსრულდა. საუკუნეზე მეტი წლოვანების ქალს, 90-ზე მეტი შთამომავალი ჰყავს.