6 იანვრის დღიური

PIA.GE-ს დღიური - რუბრიკა, სადაც დღის მნიშვნელოვან ამბებსა და პერსონებს წარმოგიდგენთ.

დღის მთავარი ამბავი

უწყვეტ რეჟიმში მიმდინარეობს ტყისა და მინდვრის ხანძრების ქრობა. ინფორმაციას შინაგან საქმეთა სამინისტროს საგანგებო სიტუაცების მართვის სამსახური ავრცელებს.

მათივე ცნობით, ამ დროისთვის ქვეყნის მასშტაბით დარჩენილია 11 კერა სადაც გრძელდება სალოკალიზაციო სამუშაოები.

ამავდროულად, გალის რაიონის შემდეგ ოკუპირებული აფხაზეთის გაგრის რაიონშიც ტყე იწვის.

⏩ გაგრის მახლობლად ხანძარი ცენტრალურ ავტომაგისტრალს მიუახლოვდა

⏩ ოკუპირებული გალის რაიონში ხანძრით დაზარალებულთა დასახმარებლად ფონდი შეიქმნა

⏩ რაჭა-ლეჩხუმის მიმართულებაზე ხანძრის ქრობის სამუშაოებში ვერტმფრენი ჩაერთო

დღის ფრაზები

დავით ზალკალიანი:

ჩვენ ფაქტობრივად უკვე უნდა დავიწყოთ მოქმედება, როგორც ევროკავშირის წევრმა ქვეყანამ. ევროკავშირს უნდა დავანახოთ ჩვენი მიმზიდველობა და ჩვენი ფუნქცია. ამიტომ, ეს მოითხოვს ჩვენი მხრიდან გაასმაგებულ ენერგიას, ყველა სტრუქტურის და ყველა ინსტიტუტის კონსოლიდაციას ამ მიზნის გარშემო, რაც საბოლოო ჯამში დაგვეხმარება ამ მიზნის მიღწევაში.

პაატა იმნაძე:

დისტანციის დაცვა და პირბადის გაკეთება ერთნაირად არის საჭირო ყველა ადამიანისთვის. გინდა მორწმუნე იყოს და გინდა ურწმუნო.

არქიმანდრიტი იოანე:

რა თქმა უნდა, მრევლს ველოდებით და ვთხოვთ, რომ იყოს დაცული დისტანცია, პირბადეებიც ყველას უნდა ჰქონდეს აუცილებლად, რომ უსაფრთხოების ელემენტარული ზომები იყოს დაცული," - განაცხადა არქიმანდრიტმა იოანე მჭედლიშვილმა.

დღის კარგი ამბავი

შობის დღესასწაულთან დაკავშირებით, დღეს, 21:00 საათიდან 7 იანვრის 05:00 საათამდე გადაადგილებაზე შეზღუდვა იხსნება. აღნიშნული გადაწყვეტილება საკოორდინაციო საბჭოზე მიიღეს.

როგორც საკოორდინაციო საბჭოს მიერ გავრცელებულ ინფორმაციაშია ნათქვამი, შობის ღამის გარდა გადაადგილებაზე შეზღუდვები კვლავ ძალაში რჩება მთელი ქვეყნის მასშტაბით 21:00 საათიდან 05:00 საათამდე.

დღის ცუდი ამბავი

პოლიციამ თბილისში 1999 წელს დაბადებული გ.ა. ძმის განზრახ მკვლელობის ბრალდებით დააკავა.

გამოძიებით დადგინდა, რომ ბრალდებულმა ძმას - 2001 წელს დაბადებულ მ.ა.-ს, ურთიერთშელაპარაკების ნიადაგზე, ცივი იარაღის გამოყენებით სხეულზე ჭრილობა მიაყენა.

ძმის მკვლელობაში ბრალდებულს დანაშაულის დამტკიცების შემთხვევაში, 7-დან 15 წლამდე ვადით თავისუფლების აღკვეთა ემუქრება.

დღის უცხოური ამბავი

აშშ-ის „დემოკრატიული პარტიის“ კანდიდატმა რაფაელ ვარნოკმა ჯორჯიის შტატში სენატის არჩევნებში გაიმარჯვა. ამომრჩეველთა ხმების 98%-ის დათვლის შემდეგ სწორედ ის იმარჯვებს.

წინასწარი შედეგებით, ვარნოკმა „რესპუბლიკური პარტიის“ კანდიდატი კელი ლეფლერი დაამარცხა. საბოლოო შედეგების გამოქვეყნების შემდეგ ის პირველი შავკანიანი სენატორი იქნება ჯორჯიის შტატის ისტორიაში.

დღის ფოტო

გაგრის მახლობლად ხანძარი ცენტრალურ ავტომაგისტრალს მიუახლოვდა