ბექა მჭედლიშვილი ალეკო ელისაშვილს: კაცს ბარამიძე რომ ხმას გაგაწყვეტინებს, რა უნდა მოგთხოვო
1605783441
თავდაცვის სამინისტროს სტრატეგიული კომუნიკაციებისა და საზოგადოებასთან ურთიერთობის დეპარტამენტის უფროსის მოადგილე ბექა მჭედლიშვილი პარტია „მოქალაქეების“ ლიდერის ალეკო ელისაშვილის განცხადებას ეხმაურება, რომლის თანახმად მან თავდაცვის მინისტრი ირაკლი ღარიბაშვილი გააკრიტიკა.
როგორც ბექა მჭედლიშვილი აღნიშნავს, ჯარისკაცებს კომფორტული ფეხსაცმელი და კომფორტული გადაადგილების საშუალება სჭირდება და ეს ყველას უნდა ესმოდეს:
„ყოვლისმცოდნე ელისაშვილი ისევ იმას ლაპარაკობს ნეგატიურ კონტექსტში, ღარიბაშვილი ჯარისკაცებისთვის სამარშრუტო ტაქსებს და ფეხსაცმელებს ყიდულობსო... ჯერ ერთი ის უნდა გესმოდეს რომ ჯარისკაცებს კომფორტული ფეხსაცმელიც სჭირდებათ და კომფორტული გადაადგილების საშუალებაც. და კი ფორმებიც ახალი აქვთ ჯარისკაცებს, ფეხსაცმელებიც, საკვებიც საუკეთესო, დაზღვევაც, გადაადგილების საშუალებებიც კომფორტული...
შეიარაღებას რაც შეეხება, რაც წლებია არ გაკეთებულა წელს გაკეთდა, საჰაერო თავდაცვა, ავიაციის აღდგენა, საზენიტო სარაკეტო დანადგარები, ახალი პარტია ჯაველინები, მთელ ჯარს ახალი M4-ები, დელტას წარმოებული 40 ერთეული საბრძოლო მანქანა რომელიც ჯარს გადაეცა, ათასობით ჭურვი, ყუმბარმტყორცნები, ტყვიამფრქვევები და ასე შემდეგ... და ყველაფერი ექნება ჯარს, რაც სჭირდება და არასოდეს არ ჰქონია!
მეორე, წინ რომ ადამიანი გიზის, რომლის პოლიტიკურმა პარტნიორმა და დამფინანსებელმა ჯარი გააღატაკა და გაძარცვა და შენ ამ აბსოლუტურად სულელური ჭორაობისთვის გცალია, იმის ნაცვლად რომ ერთხელ მაინც ცხოვრებაში წინ ვინც გიზის იმას გაეჯგიმო და პასუხი მოსთხოვო და არა ეკრანიდან „ივაჟკაცო“, გეტყობა როგორც გადარდებს რეალურად ჯარის მდგომარეობა. პრინციპში, კაცს ბარამიძე რომ ხმას გაგაწყვეტინებს პირდაპირ ეთერში, რა უნდა მოგთხოვო, მაგრამ მაინც.. და მესამე, არ მგონია არ იცნობდე მოქმედი ჯარისკაცებიდან რამდენიმე კაცს მაინც, ხოდა კითხე შენს სულელურ ბოდვაზე რას ფიქრობენ და რას გიპასუხებენ, არ გამოგვაპარო, ეთერიდან გვამცნე. პ.ს და შენ რა გაგიკეთებია ცხოვრებაში, უაზრობების ლაპარაკის გარდა?“, - აღნიშნულია ბექა მჭედლიშვილის განცხადებაში.
ინფორმაციისთვის, პარტია „მოქალაქეების“ ლიდერმა ალეკო ელისაშვილმა თავდაცვის მინისტრი ირაკლი ღარიბაშვილი გააკრიტიკა და აღნიშნა, რომ რეგიონში შექმნილი ვითარების პარალელურად ის სამარშრუტო ტაქსების შეძენითაა დაკავებული.
