ხანძრები და დახმარების ახალი პაკეტები - 8 იანვრის დღიური

PIA.GE-ს დღიური - რუბრიკა, სადაც დღის მნიშვნელოვან ამბებსა და პერსონებს წარმოგიდგენთ.

დღის მთავარი ამბავი

სოციალური დახმარების ახალი ტალღა იწყება.

პრემიერ-მინისტრმა გიორგი გახარიამ ისაუბრა იმ მიზნობრივი სოციალური მხარდაჭერის შესახებ, რომელსაც მთავრობა განახორციელებს და აღნიშნა, რომ მთავარია, მოქალაქეებმა კუთვნილი დახმარება რაც შეიძლება სწრაფად და დროულად მიიღონ.

„ახალი წლიდან იწყება ახალი ეტაპი, ახალი ტალღა მიზნობრივი სოციალური დახმარებისა, რომელიც მოიცავს სისტემურ ნაბიჯებს, სისტემურ სოციალურ მხარდაჭერას ჩვენი მოქალაქეებისა“,- აღნიშნა გიორგი გახარიამ.

იხილეთ ვრცლად რა დახმარებას მიიღებთ.

⏩მაჭავარიანი: ძალაში შედის უმუშევრად დარჩენილებისთვის 1200 ლარიანი დახმარება

⏩ივანე მაჭავარიანი: დაქირავებით დასაქმებულთათვის 200-ლარიანი კომპენსაციის მისაღებად რეგისტრაცია დაიწყო

დღის ფრაზები

სერგეი შამბა:

ხანძრის ჩასაქრობად სოხუმს თბილისის დახმარება არ სჭირდება.

ჯო ბაიდენი:

ტრამპი აშშ-ში შიდა ტერორიზმს ხელს უწყობს.

რეჯეფ თაიფ ერდოღანი:

აშშ-ში, რომელსაც დემოკრატიის აკვანს უწოდებენ, ეს პროცესი მთელი კაცობრიობისთვის შოკი იყო.

დღის პერსონა

ფინანსთა მინისტრის ივანე მაჭავარიანის განცხადებით, მათთვის, ვინც სამსახური დაკარგეს, 1200 ლარიანი დახმარება ძალაში შევა.

მინისტრის განმარტებით, დახმარებას მიიღებენ ის პირები, ვინც 2020 წლის ნოემბრის ჩათვლით 2 თვის განმავლობაში მაინც მუშაობდა და სამსახური დაკარგა დეკემბერში, ან 2021 წლის იანვარში.

„მსგავსი პაკეტი იყო გაზაფხულზე, როდესაც შეზღუდვები დავაწესეთ. იგივე პაკეტი გაგრძელდება 1 დეკემბრიდან 6 თვის განმავლობაში. მათ ვინც სამსახური დაკარგეს 2020 წლის დეკემბერში, ან 2021 წლის იანვარ-თებერვალში, 6 თვის განმავლობაში, ყოველთვიურად 200 ლარიან დახმარებას მიიღებს“, - აღნიშნა ივანე მაჭავარიანმა.

დღის კარგი ამბავი

საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა ეკატერინე ტიკარაძემ ჟურნალისტებთან განაცხადა, რომ კორონავირუსის ვაქცინის გარკვეულ მოცულობას საქართველოში თებერვალში ელოდებიან.

„ჩვენ ვთანამშრომლობთ COVAX პლატფორმასთან, რომელიც ქვეყნების მხრიდან აუცილებლად ითხოვს ვაქცინასთან დაკავშირებით გეგმის წარდგენას. მსოფლიო ჯანდაცვის ორგანიზაციისა და COVAX პლატფორმისთვის ჩვენ წარდგენილი გვაქვს გეგმა.

ჩვენ გვაქვს ინტენსიური მოლაპარაკებები, რაც გულისხმობს იმას, რომ თებერვლის თვეში COVAX პლატფორმიდან საქართველოსთვის ველოდებით ვაქცინის გარკვეულ მოცულობას, რომელიც შესაბამისად იქნება გადანაწილებული იმ მოწყვლად ჯგუფებზე, რომლისთვისაც ვირუსის გავრცელება ყველაზე მეტად არის რისკის შემცველი“, – განაცხადა ეკატერინე ტიკარაძემ.

დღის ცუდი ამბავი

თბილისში, ნუცუბიძის პლატოზე მდებარე 13-სართულიანი საცხოვრებელი კორპუსის სახურავიდან 12 წლის მოზარდი გადავარდა. იგი ადგილზე გარდაიცვალა.

როგორც საინფორმაციო სააგენტო PIA.GE-ს შინაგან საქმეთა სამინისტროში განუცხადეს, მომხდარზე გამოძიება 115-ე მუხლით დაიწყო, რაც თვითმკვლელობამდე მიყვანას გულისხმობს.

დღის უცხოური ამბავი

ბოლო გამოკვლევების თანახმად, Pfizer-ის კორონავირუსის ვაქცინამ შეიძლება კორონავირუსის ახალი შტამის წინააღმდეგაც იმოქმედოს. ინფორმაციას associated press ავრცელებს.

მკვლევარებმა გამოიყენეს 20 ადამიანის სისხლის ნიმუში, რომლებმაც გაიკეთეს ვაქცინა, რომელიც Pfizer–მა და მისმა გერმანელმა პარტნიორმა BioNTech– მა შექმნეს. აღმოჩნდა, რომ აღნიშნული პირების სისხლში გამომუშავებულმა ანტისხეულებმა წარმატებულად გაუწიეს წინააღმდეგობა კორონავირუსის ორ ახალ შტამს.

ბრიტანელმა მეცნიერებმა განაცხადეს, რომ დიდ ბრიტანეთში ნაპოვნი ვარიანტი - რომელიც ინგლისის დომინანტ ტიპად იქცა - ჯერ კიდევ მგრძნობიარეა ვაქცინების მიმართ. ეს მუტაცია ახლა ნაპოვნია აშშ-სა და სხვა მრავალ ქვეყანაში.

Pfizer–ის გამოკვლევამ აჩვენა, რომ ვაქცინა მუშაობს 15 დამატებითი შესაძლო ვირუსის მუტაციის წინააღმდეგაც.

დიდი ბრიტანეთის ჯანდაცვის მდივანმა, მეთ ჰენკოკმა განაცხადა, რომ კორონავირუსის ახალი სახეობა შედარებით სწრაფად ვრცელდება, თუმცა უფრო საშიში არ არის.

დღის ფოტო

ხანძრის შედეგად, გაგრის რეგიონში დაახლოებით ექვსი ჰექტარ ფართობზე გამხმარი ხეები და ტყის ქვედა საფარი დაიწვა.

დღის ვიდეო

ხანძარი ბათუმის ბოტანიკური ბაღის ტერიტორიაზე.