ავტომობილების გაქირავების უმსხვილესი კომპანია გაკოტრდა
1590226166
ავტომობილების გაქირავების მომსახურების მსოფლიოში ერთ-ერთი უმსხვილესი კომპანია Hertz გაკოტრდა. ამის შესახებ ინფორმაციას უცხოური გამოცემა TheGuardian კომპანიის წარმომადგენლებზე დაყრდნობით ავრცელებს.
კომპანია კორონავირუსის პანდემიით გამოწვეული ეკონომიკური ვარდნის მორიგი მსხვერპლი აღმოჩნდა,
Hertz-ის ოფისები მუშაობასა და კლიენტების მომსახურებას მაინც განაგრძობენ. კომპანიის წარმომადგენლების თქმით, ისინი ყველაფერს აკეთებენ იმისთვის, რომ ბიზნესსაქმიანობა განაგრძონ, ხოლო გაკოტრების შესახებ გაკეთებული განცხადება მათ ვალების რესტრუქტურიზაციის საშუალებას მისცემს.
კომპანიის მიერ გაკეთებულ განცხადებაში ხაზგასმულია, რომ Covid-19-მა მოგზაურობასა და ავტომობილების გაქირავების სერვისზე მკვეთრად იმოქმედა, რამაც კომპანიის შემოსავლებზე დამანგრეველი გავლენა მოახდინა. ტურისტების გარდა, Hertz-ის მომსახურებით სარგებლობდნენ ადამიანები, რომელთა ავტომობილები შესაკეთებელი იყო, მაგრამ კორონავირუსის გამო ბევრი სახლში დარჩა და მათ ავტომობილი, უბრალოდ, არ სჭირდებოდათ.
ავტომობილების გაქირავების კომპანია Hertz-ი 1918 წელს აშშ-ში დაფუძნდა და მუშაობა რამდენიმე ათეული „ფორდის“ ფირმის ავტომობილით დაიწყო. ახლა კომპანიას მსოფლიოს მასშტაბით, დაახლოებით, 568 ათასი ავტომობილი და 12,4 ათასი გაქირავების პუნქტი აქვს. Hertz-მა გადაიტანა დიდი დეპრესია. მეორე მსოფლიო ომის დროს, პრაქტიკულად, ავტომობილების წარმოების სრული გაჩერება აშშ-ში და ნავთობის რამდენიმე კრიზისიც.
