ინდოეთში, მუმბაისთან ახლოს, ქალაქ ბჰივანდიში სამსართულიანი საცხოვრებელი კორპუსის ჩამონგრევის შედეგად, სულ მცირე, 10 ადამიანი დაიღუპა - ამის შესახებ ინფორმაციას „როიტერსი“ ავრცელებს.
გამოცემის ცნობით,დაახლოებით 25 ადამიანი ნანგრევების ქვეშაა მოყოლილი. ადგილზე მიმდინარეობს სამაშველო ოპერაცია,რომელშიც 40-მდე მეხანძრე-მაშველია ჩართული.
„შენობის ნახევარი ჩამოინგრა და 25-26 ოჯახი ჩარჩენილია შენობაში“ -განაცხადა ჟურნალისტებთან საუბრისას ქალაქის რწმუნებულმა პანკაჯ აშიამ.
ჯერჯერობით უცნობია, რამ გამოიწვია კორპუსის ნგრევა, რომელშიც 54 სახლია განთავსებული.
ინფორმაციისთვის, მომხდარის გამო მწუხარება გამოთქვა ქვეყნის პრემიერ-მინისტრმა ნარენდრა მოდიმ და აღნიშნა, რომ დაზარალებულებს ყველა სახის დახმარებას აღმოუჩენენ. შენობა 40 წლის წინ აშენდა და მასში 20-მდე ოჯახი ცხოვრობდა.