ჯო ბაიდენის თქმით, დონალდ ტრამპის სურვილი, გარდაცვლილი მოსამართლის, რუთ ბეიდერ გინსბურგის, არჩევნებამდე შეცვლის გადაწყვეტილება ტრამპის მიერ ძალაუფლების ბოროტად გამოყენებაა, - ამის შესახებ ინფორმაციას „ბი-ბი-სი“ ავრცელებს.
გამოცემის ცნობით, აშშ-ის პრეზიდენტობის დემოკრატმა კანდიდატმა განაცხადა, რომ ტრამპის ეს ნაბიჯი მისი ძალაუფლების გამყარებას ემსახურება და რესპუბლიკელ სენატორებს მოუწოდა, კანდიდატურის მხარდაჭერის პროცედურა გადადონ.
„მოვუწოდებ რესპუბლიკელ სენატორებს - გთხოვთ, თქვენი სინდისის მიხედვით იმოქმედეთ, მიეცით ადამიანებს ხმის ამოღების უფლება, ჩაახშეთ ალი, რომელშიც ჩვენი ქვეყანაა გახვეული. არ დაუჭიროთ მხარი არც ერთ ნომინანტს იმ ვითარებაში, რომელიც პრეზიდენტმა ტრამპმა და სენატორმა მაკკონელმა შექმნეს“, - აღნიშნა პრეზიდენტობის კანდიდატმა ბაიდენმა.
ინფორმაციისთვის, აშშ-ის უზენაესი სასამართლოს უხუცესი წევრი, ქალთა უფლებების აქტიური დამცველი რუთ ბეიდერ გინსბურგი 87 წლის ასაკში კიბოთი გარდაიცვალა. აშშ-ის უზენაეს სასამართლოში 9 მოსამართლეა. 20 სექტემბერს დონალდ ტრამპმა განაცხადა, რომ გინსბურგის შემცვლელის კანდიდატურას უახლოეს მომავალში წარადგენს.