თურქეთის პარლამენტი მთიან ყარაბაღში სამშვიდობო ძალების გაგზავნის საკითხს განიხილავს

თურქეთის პრეზიდენტმა რეჯეფ თაიფ ერდოღანმა პარლამენტში კანონპროექტი შეიტანა მთიან ყარაბაღში სამშვიდობო ძალების გაგზავნის შესახებ. ამის თაობაზე სააგენტო Anadolu იუწყება.

კანონპროექტში აღნიშნულია, რომ თურქი სამშვიდობო ძალების გაგზავნა ერთი წლით იგეგმება და ეს „რეგიონის მოსახლეობის კეთილდღეობის უზრუნველსაყოფად“ განხორციელდება. დოკუმენტს თურქეთის პარლამენტი 17 ნოემბერს უყრის კენჭს.

თურქეთის სამშვიდობო ძალების სტატუსი ჯერჯერობით ბოლომდე გადაწყვეტილი არ არის, მთიან ყარაბაღში ცეცხლის შეწყვეტის შესახებ შეთანხმების გაფორმების შემდეგ რუსეთის ოფიციალური პირები აცხადებდნენ, რომ შეთანხმებაში თურქ სამშვიდობოებზე საუბარი არ არის.

ასევე უცნობია, შეასრულებენ თუ არა თურქი სამხედროები მხოლოდ დამკვირვებლების ფუნქციას და კონკრეტულად სად განთავსდებიან ისინი.

ცნობისთვის, აზერბაიჯანის პრეზიდენტმა ილჰამ ალიევმა, სომხეთის პრემიერ-მინისტრმა ნიკოლ ფაშინიანმა და რუსეთის პრეზიდენტმა ვლადიმერ პუტინმა 10 ნოემბერს ხელი მოაწერეს შეთანხმებას მთიან ყარაბაღში საბრძოლო მოქმედებების შეჩერების შესახებ. შეთანხმების მიხედვით, რამდენიმე რაიონს სომხური მხარე აზერბაიჯანს გადასცემს, მხარეები ტყვეთა და დაღუპულთა გაცვლას განახორციელებენ, ხოლო რეგიონში რუსეთის სამშვიდობო ძალები განთავსდებიან.