აშშ-მა კორონავირუსით ინფიცირების რაოდენობის ზრდის ტემპით იტალიას გაასწრო

კორონავირუსი ევროპასთან ერთად, ძალებს ამერიკის კონტინენტზეც იკრებს. 22 მარტს შეერთებულ შტატებში ინფიცირებულთა ზრდის ტემპი რეკორდულად 9339 პირით გაიზარდა და ამ მაჩვენებლით იტალიასაც კი გაუსწრო.

კორონავირუსით ინფიცირებულთა რიცხვი აშშ-ში ამჟამად 35 060-ს აღწევს, რაც 1 კვირის წინანდელ მაჩვენებელს 650%-ით აღემატება. შემთხვევათა 48%-ზე მეტი - 16 900 ინფიცირებულ ნიუ-იორკის შტატზე მოდის, მეორე ადგილზე 2000-მდე ინფიცირებულით ვაშინგტონია. კორონავირუსით დაავადებულთა რაოდენობა 1000-ს კიდევ 5 შტატში: ნიუ-ჯერსიში, კალიფორნიაში, ილინოისში, მიშიგანსა და ფლორიდაში აჭარბებს.

22 მარტს ინფიცირებულთა რაოდენობასთან ერთად, რეკორდულად 117-ით გაიზარდა გარდაცვლილთა რიცხვიც და მსხვერპლმა 457-ს მიაღწია.

ამჟამად შეერთებული შტატები ინფიცირებულთა რაოდენობის მიხედვით მე-3, ხოლოდ მსხვერპლის რიცვით მე-6 ადგილს იკავებს.

23 მარტის დილის მონაცემებით მსოფლიო მასშტაბით ლაბორატირიულად დადასტურებული კორონავირუსის 339 710 შემთხვევაა აღრიცხული, საიდანაც 14 704 გარდაიცვალა, 99 014 კი გამოჯანმრთელდა.

რაც შეეხება საქართველოს სულ გამოვლენილია 54 შემთხვევა, 4 მათგანის მდგომარეობა მძიმეა, 8 პირი უკვე გამონაჯმრთელდა. კარანტინის რეჟიმში 3254, ხოლო სტაციონალური მეთვალყურეობის ქვეშ 233 პირი იმყოფება. ვირუსის გავრცელების შეკავების მიზეზით გამოცხადებული საგანგებო მდგომარეობა 21 აპრილს სრულდება. სრულ კარანტინზეა გადასული ბოლნისისა და მარნეულის მუნიციპალიტეტები.